Ռուսական Regnum լրատվական գործակալության փոխանցմամբ՝ Ադրբեջանի Հանրապետության պետական նավթային ընկերության (SOCAR) նախագահ Ռովնագ Աբդուլաևը հայտարարել է, որ ադրբեջանական «Շահ Դենիզ» գազային հանքավայրի երկրորդ փուլի մշակման արդյունքում ստացվելիք գազի արտահանման երթուղու ընտրության հարցը կարող է ձգձգվել մինչև 2012 թվականի առաջին եռամսյակ.
«Մենք դեռևս ընտրություն չենք կատարել մեր գազի եվրոպական արտահանման երթուղիներից մեկի օգտին։ Մենք մանրամասն դիտարկում ենք բոլոր ստացված առաջարկները։ Միևնույն ժամանակ մեր առջև այնպիսի նպատակ չենք դրել, որ այդ գործընթացը պետք է ավարտենք մինչև տարեվերջ։
Ես համաձայն չեմ այն կանխատեսումների հետ, թե Nabucco նախագիծը տապալվել է։ Չգիտեմ, թե ինչի հիման վրա են արվում այդպիսի կանխատեսումները։ Nabucco-ն TransAdriatic Pipeline (TAP) և ITGI նախագծերի նման գտնվում է քննարկման փուլում»։
Հիշեցնենք, որ օրեր առաջ Ադրբեջանի արտգործնախարար Էլմար Մամեդյարովը հայտարարել էր, որ ադրբեջանական գազն առաջին անգամ Եվրոպա կհասնի 2018-2020 թվականներին։ Ի դեպ, «Շահ Դենիզ»-ի մշակման երկրորդ փուլը մեկնարկելու է 2017 թվականին։
