«Այսօր ամբողջ աշխարհում պայքարում են անքնության դեմ, հատկապես քնաբեր հաբերի միջոցով, որոնք վնասակար են օրգանիզմի համար: Սա հանգեցնում է մի շարք հիվանդությունների: Անքնությունը հիմնականում հիվանդությունների արդյունք է, հատկապես սրան նպաստում են ինֆեկցիոն հիվանդությունները և հորմոնալ խանգարումները, իսկ անքնությունն իր հերթին առաջացնում է, նյութափոխանակության խանգարում: Մարդիկ հաճախ աշխատանքային ժամերը երկարացնում են քնի ժամի հաշվին, սակայն մոռանում են, որ քնելուց վերականգնվում է օրգանիզմը»,- այսօր հրավիրված մամուլի ասուլիսի ժամանակ ասել է բժշկական գիտությունների դոկտոր Աշոտ Աշոտյանը:
Նրա խոսքերով` չքնելու հետևանքով մարդիկ վաղաժամ են ծերանում և շուտ են մահանում. «Քունը օրգանիզմում ապահովում է նեգատոնին հորմոնը, հատկապես երեկոյան ժամերին այն ավելի արագ է աշխատում: Նրա ֆունկցիան է` կասեցնել մարդու հոգեկան և ֆիզիկական ակտիվությունը: Մարդն ուզում է քնել»: Տարբեր մարդկանց մոտ տարբեր են քնի ժամերը, հիմնականում 7-10 ժամյա քունը բավարար է օրգանիզմը վերականգնելու համար:
Ըստ բժշկի` հարթավայրային գոտում ապրող մարդիկ ավելի երկար են քնում: Մարդն իր կյանքի 1/3-ն անցկացնում է քնած: Գինեսի գրքում գրանցված` մինչ օրս ամենաշատ արթուն մնացած մարդը 17-ամյա մի երիտասարդ է, ով 240 ժամ 15 րոպե արթուն է մնացել, որից հետո քնել է 15 ժամ: Այսինքն` քունն ինքնանպատակ չէ, և չարժե քնած ժամանակը համարել կորած:
Ըստ ֆիզիոթերապևտ Գագիկ Կարապետյանի` սխալ է քնաբեր հաբերի միջոցով քնելը, առավոտյան մարդն ունենում է գլխացավ և գլխապտույտ: Ավելի լավ է օգտագործել մեղր, մածուն, կատվախոտ և շատ զբաղվել ֆիզիկական աշխատանքով: Քնի կարևոր գործոն է նաև անկողինը, այն պետք է լինի ոչ այնքան փափուկ, գլուխը հյուսիսում, իսկ բարձը պետք է պահպանի պարանոցը: Այժմ ձմեռ է,իսկ ձմռանը նեգատոնին հորմոնը 20 տոկոսով ավելի է արտադրվում, մարդիկ ձմռանը ավելի շատ են ուզում քնել: Ֆիզիոթերապևտը խորհուրդ տվեց չխախտել քնի ժամերը:
