Միանշանակ է, որ ՀՀԿ-ի և «Բարգավաճ Հայաստան» կուսակցության՝ ընտրություններին միասնական ցուցակով հանդես գալու դեպքում ԲՀԿ այդ քայլից դժգոհ մի ստվար ընտրազանգված կգերադասի իր քվեն տալ ընդդիմադիր ուժերին: «Առաջին լրատվական»-ի հետ զրույցում նման տեսակետ հայտնեց Ժողովրդական կուսակցության առաջնորդ Տիգրան Կարապետյանը:
«Միաժամանակ, հստակ չի կարելի ասել՝ ընդդիմադիր որ կուսակցությանը ձայն կտան ԲՀԿ-ից դժգոհ մարդիկ: Կասկածում եմ, որ դա կլինի Հայ ազգային կոնգրեսը, քանի որ վերջինս իր դիրքերը կորցնում է: Ընդ որում՝ ԲՀԿ-ն ինքնակամ միասնական ցուցակի չի գնա, եթե նման բան լինի, կնշանակի, որ նրան ստիպել են: ԲՀԿ-ին ձեռնտու չէ ընտրություններին միասնական ցուցակով գնալ, նա մեծ ծախսեր է անում, բացի այդ՝ Գագիկ Ծառուկյանը հավակնություններ ունի»,- նկատեց ԺԿ նախագահը:
Ամփոփելով՝ նա տեսակետ հայտնեց, որ ՀՀԿ-ն, ամեն դեպքում, կկարողանա միասնական ցուցակ պարտադրել իր կոալիցիոն գործընկերոջը՝ ԲՀԿ-ին: «Իրենք էլ հաշվարկ ունեն. պապն ամեն անգամ փլավ չի ուտի»,- ասաց նա: