Վայոց ձորի մարզի 3 համայնքներում՝ Եղեգնաձոր, Մալիշկա գյուղ, Վայք քաղաք, վերաբացվել են «Հայփոստ»-ի բաժանմունքները: Միջոցառմանը ներկա էին Վայոց ձորի մարզպետ Սերգեյ Բագրատյանը, Վայքի քաղաքապետ Հարություն Սարգսյանը, «Հայփոստ թրասթ մենեջմենթ»-ի հավատարմագրային կառավարիչ Խուան Պաբլո Գեչիջյանը, «Հայփոստ» ՓԲԸ-ի ղեկավարությունը, ինչպես նաև տեղի բնակիչներ:
Վայոց ձորի մարզպետ Բագրատյանն իր խոսքում շնորհակալություն հայտնեց «Հայփոստ»-ին հոգատարության համար՝ առանձնակի շեշտելով բարելավված բաժանմունքների կարևորությունը տեղի բնակիչների համար:
Ինչպես իր ողջույնի խոսքում նշեց «Հայփոստ Թրասթ Մենեջմենթ»-ի գլխավոր տնօրեն Խուան Պաբլո Գեչիջյանը «շենքը վերանորոգում և նորացնում է «Հայփոստ»-ը, սակայն ոգին ներդնում են աշխատակիցներն ու այնտեղ հաճախող բնակիչները»:
Վայքի քաղաքապետն իր հերթին, շնորհակալություն հայտնելով «Հայփոստ»-ի ղեկավարությանը, առանձնացրեց սպասարկման որակի բարձրացման և շենքային պայմանների, ենթակառուցվածքների, ինչպես նաև տեխնիկական հագեցվածության համարժեքության կարևորությունը:
«Հայփոստ Թրասթ Մենեջմենթ»-ն առանձնակի ուշադրություն է դարձնում մարզերում «Հայփոստ»-ի պատշաճ ներկայությանն ու փոստային և հարակից ծառայությունների զարգացմանը: Այս բաժանմունքներում ևս նորացվել են աշխատանքային ստանդարտները, փոխվել և նորացվել են ենթակառույցները, տեղադրվել են արդի ծրագրերին համապատասխանող նոր համակարգիչներ, նորացվել է մալուխային համակարգը և այլն:
Մինչև տարեվերջ նախատեսվում է վերաբացված բաժանմունքների թիվը հասցնել 104-ի` ինչպես Երևանում, այնպես էլ հանրապետության մարզերում:
Բացումների պաշտոնական արարողություններից հետո «Հայփոստ» ՓԲԸ գլխավոր տնօրենի պաշտոնակատար Հայկ Ավագյանը, պատասխանելով ներկա լրագրողների հարցերին, անդրադարձավ Վանաձորի փոստային բաժանմունքում տեղի գտած յուրացումների դեպքին, որի կապակցությամբ ՀՀ դատախազությունը հարուցել է քրեական գործ: «Վանաձորի դեպքը, ինչպես նմանատիպ մյուս դեպքերը, բացահայտել և դրանց մասին իրավապահ մարմիններին է ահազանգել «Հայփոստ»-ը: Ընդհանուր առմամբ, այսօր «Հայփոստ թրասթ մենեջմնեթի» և «Հայփոստ» ՓԲԸ-ի ղեկավարության կողմից շատ խիստ վերահսկողություն է իրականացվում, և այդ վերահսկողության շնորհիվ է նաև որ կենսաթոշակների բաշխման գործընթացում հնարավոր եղավ շտկել թերությունները և պետբյուջե վերադարձնել շուրջ 21 մլրդ դրամ:
