Անշարժ գույքի շուկայում դեկտեմբերն աշխույժ ամիս է համարվում: Ինչպես «Առաջին լրատվական»-ի հետ զրույցում նշեց անշարժ գույքի շուկայի մասնագետ Դավիթ Հովհաննիսյանը, թեև մինչև նոր տարի վիճակը լավանում է, բայց գների հետ կապված փոփոխություն չկա: Մասնագետի խոսքով, գների ամենամսյա մեկ այս, մեկ այն կողմ տատանումներն աննշան են, բայց ընդհանուր կայուն վիճակ է:
Դ. Հովհաննիսյանի խոսքով, անցած տարվա համեմատ անշարժ գույքի վաճառքի ծավալները մի փոքր ավելացել են, բայց նախաճգնաժամային շրջանի հետ բոլորովին չի կարելի համեմատել. «Եթե մինչև ճգնաժամը 100% էր, ապա հիմա 10% է: Տարբերությունն այդքան մեծ է»:
Ըստ նրա՝ գործարքների առումով հիմնականում աշխույժ լինում է մայիսը և դեկտեմբերը, իսկ նորակառույցների դեպքում՝ օգոստոսն ու դեկտեմբերը, երբ զբոսաշրջիկները գալիս են ու նաև տների հարց են լուծում: Հունվարը ընդհանրապես պասիվ ամիս է, փետրվարից սկսում է շուկան աշխուժանալ:
Անդրադառնալով միայն բնակարանների վաճառքին՝ Դ. Հովհաննիսյանը հայտնեց, որ քանակը շատացել է, և ավելի շատ մարդ է վաճառում: «Սա սոցիալական վիճակի վատացման հետ է կապված: Շատ մարդիկ վաճառում են, որ գնան երկրից: Այս միտումը շատ լուրջ նկատվում է. վաճառվող գույքի 30-35%-ը զուտ հեռանալու կամ սոցիալական վատ վիճակի հետ է կապված»:
Նշենք, որ Անշարժ գույքի կադաստրի պետական կոմիտեն այս տարվա օգոստոս ամսվանից հետո շուկայի վերլուծություն չի հրապարակել: