Iran News-ի փոխանցմամբ, Իսրայելում ԱՄՆ դեսպան Դան Շապիրոն լրագրողների հետ զրույցում հերքել է շրջանառվող այն տեղեկատվությունը, թե ԱՄՆ նախագահ Բարաք Օբամայի վարչակազմին մեծապես մտահոգում է Իրանին ռազմական հարված հասցնելու վերաբերյալ Իսրայելի պլաններից իրազեկված չլինելը։
Շապիրոն ընդգծել է, որ Իրանի հարցում Իսրայելն իր գործողություններն ամբողջովին կոորդինացնում է ԱՄՆ-ի հետ։
Նշվում է, որ Շապիրոյի այս հայտարարությունը հակասում է սրանից առաջ ԱՄՆ Գլխավոր շտաբի պետ, գեներալ Մարտին Դեմփսիի արած այն հայտարարությանը, որում նա ընդգծել էր, թե վստահ չէ, որ Իսրայելն Իրանին առնչվող իր պլանների մասին կիրազեկի ԱՄՆ-ին։
Շապիրոն հերքել է նաև այն տեղեկատվությունը, թե ԱՄՆ նախագահ Բարաք Օբաման շուտով կայցելի Իսրայել։
Հիշեցնենք, որ ամերիկացի դեմոկրատ սենատոր, զինված ուժերի գծով ԱՄՆ Սենատի կոմիտեի նախագահ Կառլ Լևինն իր հերթին հայտարարել էր. «Ես չեմ կարծում, թե Սպիտակ տունը տեղյակ է Իրանի նկատմամբ Իսրայելի ձեռնարկելիք քայլերից։ Ես վստահ չեմ, որ Իսրայելը կողմնորոշվել է իր պլաններում։ Իսրայելն այնպիսի մարտավարություն է ընտրել, երբ վատ տղաներին պահում են անորոշության մեջ։ Թող վատ տղաները կռահեն դա»։
