«Տիտանիկ» նավի խորտակման 100–ամյակը նշելու համար հատուկ սուզանավակի միջոցով կարելի է իջնել Ատլանտյան օվկիանոսի հատակը՝ նավի մնացորդները տեսնելու համար։
Նման ուղևորությունը հաստատ նրանց համար չէ, ովքեր վախ ունեն փակ տարածությունից, և ընդհանրապես բնակչության 99 տոկոսի համար չէ, քանի որ 8-10 ժամ տևող ուղևորությունն արժե 60.000 դոլար:
Բայց «Տիտանիկ»–ի երկրպագուների համար գինը և այլ խոչընդոտները կարևոր չեն, հատկապես՝ երբ նավի խորտակման 100–ամյակի արարողությունը կայանալու է 2012 թվականի ապրիլի 15-ին:
Նյու Յորքի բանկիր Ռենատա Ռոջասն ասել է, որ նման հնարավորություն կյանքում մեկ անգամ է լինում. «Ես 10 տարեկանից խենթի պես սիրահարված եմ եղել «Տիտանիկ»–ին»:
The New Youk Times-ը գրում է, որ, ըստ Deep Ocean Expeditions ընկերության, որը և կազմակերպում է այս ուղևորությունը, նվազագույնը 80 մարդ արդեն Ատլանտյան օվկիանոսի հատակը իջնելու ցանկություն է հայտնել։
