Երևանի քաղաքապետ Տարոն Մարգարյանը հանդիպել է ՀՀ-ում Ֆրանսիայի Հանրապետության արտակարգ և լիազոր դեսպան Անրի Ռենոյի հետ: Դեսպան Անրի Ռենոն ընդգծել է Տարոն Մարգարյանի ստանձնած պաշտոնի պատասխանատվության բարձր աստիճանն ու վստահություն հայտնել, որ երկու մայրաքաղաքների միջև ձևավորված բարեկամական և տնտեսական կապերը հետագայում ևս կշարունակեն համաչափ զարգանալ:
Տարոն Մարգարյանը նախ կարևորել է Երևանի քաղաքապետարանի և Ֆրանսիայի քաղաքների ու շրջանների հետ համագործակցությունը, ինչը ներկայում ոչ միայն բավականին ակտիվ է, այլև զարգացման լայն հեռանկարներ ունի:
«Հայ-ֆրանսիական բարեկամական հարաբերությունները նոր չեն և այսօր էլ բավական ամուր հիմքերի վրա են դրված: Մենք գործակցության համաձայնագրեր և ծարգրեր ունենք Փարիզի, Նիցի, Լիոնի, ինչպես նաև Իլ դը Ֆրանս շրջանի հետ: Վստահ եմ, որ դրանք հաջողությամբ իրականություն կդառնան և այսուհետ էլ ավելի կընդլայնվեն: Այդ հարցում ակնկալում ենք նաև Ձեր աջակցությունը»,- նշել է Երևանի քաղաքապետը:
Դեսպան Անրի Ռենոն պատրաստակամություն է հայտնել իր կողմից աջակցել ու օժանդակել երկուստեք կապերի ամրապնդմանն ու էլ ավելի խորացմանն ուղղված բոլոր նախաձեռնություններին: Օգտվելով առիթից դեսպանը նաև շնորհակալություն է հայտնել հոկտեմբերին Երևանում անցկացված ֆրանկոֆոն քաղաքապետերի միջազգային ասոցիացիայի 31-րդ գլխավոր վեհաժողովը բարձր մակարդակով կազմակերպելու և անցկացնելու համար:
«Այդ օրերին Փարիզի քաղաքապետ Բերտրան Դելանոեի պաշտոնական այցի շրջանակում ստորագրվեց բարեկամության և համագործակցության համաձայնագիր, որը, վստահ եմ, նոր լիցք կհաղորդի մեր գործակցությանը: Հույս ունեմ, որ հաջորդ տարի Ձեզ կհյուրընկալենք Փարիզում, և Ձեր այցը կդառնա կնքված համաձայնագրի կիրարկման գործնական փուլի մեկնարկը»,- նշել է Անրի Ռենոն:
Երևանի քաղաքապետ Տարոն Մարգարյանը՝ նշելով, որ մարտի 15-ից ապրիլի 15-ը Հայաստանում անցկացվելիք ֆրանկոֆոնիայի միամսյակը նույնպես բարձր մակարդակով կկազմակերպվի , մեկ անգամ ևս փաստել է, որ Երևանը կարևորում և բարձր է գնահատում ֆրանկոֆոն քաղաքների հետ համագործակցության սերտացումն ու ընդլայնումը:
«Երևանի քաղաքապետարանը պատրաստ է աջակցել այն բոլոր ծրագրերի իրականացմանը, որոնք միտված են տարբեր ոլորտներում Երևանի և ֆրանկոֆոն քաղաքների, մասնավորապես Ֆրանսիայի տարբեր քաղաքների միջև բարեկամական և գործակցային կապերի ձևավորմանն ու զարգացմանը»,- ընդգծել է Տարոն Մարգարյանը: Այս մասին «Առաջին լրատվական»-ին հայտնում են Երևանի քաղաքապետարանի տեղեկատվության և հասարակայնության հետ կապերի վարչությունը: