Irib News-ի փոխանցմամբ՝ Իրանի խորհրդարանի ազգային անվտանգության և արտաքին քաղաքականության հանձնաժողովի նախագահ Ալաեդդին Բորուջերդին հայտարարել է, որ Մեծ Բրիտանիայի կառավարությունը Թեհրանում իր դեսպանատան դիմաց իրանցի ուսանողների կազմակերպած բողոքի ակցիան գործածել է որպես պատրվակ, որպեսզի Իրանից դուրս բերի իր դիվանագետներին.
«Բրիտանիան շտապել է խզել Իրանի հետ իր հարաբերությունները, մինչդեռ Իրանի կառավարությունը մտադրվել էր միայն նվազեցնել Լոնդոնի հետ իր հարաբերությունների մակարդակը։ Դրա համար էլ այս ամենի պատասխանատվությունն ընկնում է Լոնդոնի ուսերին։
1980 թվականին, երբ Լոնդոնում գտնվող Իրանի դեսպանատունը հարձակման էր ենթարկվել մի խումբ ահաբեկիչների կողմից, Մեծ Բրիտանիայի կառավարությունը չէր ձեռնարկել իր տարածքում գտնվող իրանական դեսպանատան պաշտպանության համապատասխան միջոցներ, ինչի արդյունքում զոհվել էին իրանցի դիվանագետներ։
Մինչդեռ Իրանի ոստիկանությունը, ի տարբերություն իր բրիտանական գործընկերոջ, միջոցներ է ձեռնարկել բրիտանական դեսպանատան պաշտպանության ուղղությամբ։ Ձերբակալվել են այդ ակցիայի մասնակիցները։ Բրիտանական դեսպանատան աշխատակիցն անգամ շնորհակալություն է հայտնել Թեհրանին՝ ոստիկանության գործողությունների համար։
Եվրոպական երկրները չպետք է աջակցեն Մեծ Բրիտանիային նրա հակաիրանական դավադրության հարցում, այլ պետք է շարունակեն իրենց նորմալ հարաբերություններն Իրանի հետ»։
Հիշեցնենք, որ Մեծ Բրիտանիայից հետո Իրանում իր դեսպանատունն է փակել Նորվեգիան՝ ելնելով անվտանգության նկատառումներից։
