Հայաստանի Մարդու իրավունքների պաշտպանը չի զգում ո՛չ իշխանության, ո՛չ ընդդիմության աջակցությունը: Այս մասին նա ասաց այսօր կայացած մամլո ասուլիսի ժամանակ:
«Քաղաքական հենարան չունեմ ո՛չ ընդդիմության, ո՛չ իշխանության մոտ: ՄԻՊ-ի միակ հենարանը քաղաքացիական հասարակության աջակցությունն է»,- նկատեց Կարեն Անդրեասյանը:
Անդրադառնալով գրասենյակ ստացվող դիմումներին`նա նկատեց, որ գործի վարույթ սկսելու համար իրեն անհրաժեշտ է մարդու կողմից ահազանգ ստանալ, իսկ մամուլում եղած հրապարակումները այս կամ այն երևույթի մասին գործի վարույթ սկսելու հիմք չեն կարող լինել: «Բացառություն են կազմում դեպքերը, երբ մարդը հաշմանդամ է կամ չի կարող զանգահարել մեզ, այդ դեպքում մենք ինքներս ենք զբաղվում նրա բարձրաձայնած խնդրով»,- նշեց նա:
Խոսելով իր մարզային վերջին այցերից` Կարեն Անդրեասյանը նկատեց, որ հանրապետության չորս մարզերում` Սյունիքում, Տավուշում, Շիրակում և Վայոց ձորում, քաղաքացիներն իրեն բողոքել են ամենատարբեր հարցերի շուրջ`սոցիալական ոլորտի խախտումներ, կենսաթոշակների բարձրացում, զինծառայողների ունեցած խնդիրներ և այլն: «Ինչ վերաբերում է մարզային գրասենյակներին, ապա պետբյուջեով ինձ մերժեցին մարզային գրասենյակներ բացել, սակայն ենթադրվում է, որ ամենաուշը փետրվարի 1-ից այդպիսի 6 գրասենյակներ, այնուամենայնիվ, կբացվեն»,- նկատեց նա:
Անդրադառնալով ՄԻՊ գրասենյակի ստացած դիմումների վիճակագրությանը` Կարեն Անդրեասյանը նկատեց, որ 2011-ի մարտից իրենք ստացել են ընդհանուր առմամբ 2904 դիմում, որից 1307-ը`գրավոր, 1597-ը`բանավոր: «Բողոքներից 220 -ը վերաբերում են ոստիկանությանը, 194-ը` դատարաններին, 152-ը` Աշխատանքի նախարարությանը, 116-ը` Երևանի քաղաքապետարանին, 48-ը` Պաշտպանության նախարարությանը, 38-ը` ՔԿՀ-ներին, 35-ը` դատախազությանը, 32-ը` անձնագրային և վիզային վարչությանը, 30-ը` կադաստրի պետական կոմիտեին: Գրավոր դիմումներից 802-ը Երևանից են: Միակ տեղը, ուր դիմումների պակաս կա, Լոռու մարզն է: Երևանից հետո այս տարի առաջատարը Կոտայքի մարզն է»,- ասաց ՄԻՊ-ը` հավելելով, որ Մարտի 1-ի զոհերի հարազատներից դիմումներ մինչ այժմ չի ստացել, իսկ գրավոր դիմումներից դրական լուծում ստացել են 123-ը: