Հայաստանում ԱՄՆ դեսպան Ջոն Հեֆերնի հայտարարությունը, թե՝ ինքը հույս ունի մի օր Գյումրիից Կարս ուղևորվել, ինչպես նաև Միջազգային ճգնաժամային խմբի (ICG) եվրոպական ծրագրի տնօրեն Սաբինա Ֆրեյզերի հայտնած կարծիքը, թե՝ հայ-թուրքական արձանագրությունները դեռ կարող են քվեարկության դրվել թուրքական խորհրդարանում, չեն նշանակում, որ ամերիկյան կողմը սկսել է կրկին առանձնահատուկ ուշադրություն դարձնել երկու երկրների հարաբերությունների կարգավորման գործընթացին. այս հայտարարությունները հերթականներից են: «Առաջին լրատվական»-ի հետ զրույցում նման տեսակետ հայտնեց թուրքագետ Ռուբեն Սաֆրաստյանը:
«Չեմ կարծում, որ հայ-թուրքական գործընթացում սկզբունքային, նոր զարգացումներ կան, որովհետև դրա նախանշանները չեմ տեսնում: Միակ բանը, որի վրա հենվում են բոլոր լավատեսական մոտեցումները, Թուրքիայի նախագահ Աբդուլահ Գյուլի հայտարարությունն է, որ հայ-թուրքական արձանագրությունները դեռ կենդանի են: Բայց դրա կողքին կան թուրք պաշտոնյաների բազմաթիվ այլ հայտարարություններ, որոնք վկայում են, որ Թուրքիան ներկա փուլում Հայաստանի հետ հարաբերություններում պատրաստ չէ սկզբունքային քայլեր անելու: Թուրքիայի հետաքրքրություններն այժմ Մերձավոր Արևելքում են: Կարծում եմ՝ Թուրքիան Հայաստանի հետ հարաբերություններում կոնսերվացման քաղաքականություն է վարում»,- նկատեց թուրքագետը:
Վերադառնալով հայ-թուրքական գործընթացն ակտիվացնելու ամերիկյան կողմի հորդորներին՝ Ռուբեն Սաֆրաստյանը նկատեց, որ հայտարարություններ մինչ այժմ արվել են ամեն հարմար առիթով: «Ամերիկացիները կողմնակից են հայ-թուրքական հարաբերությունների շուտափույթ կարգավորմանը և այս հարցով թուրքերի հետ մշտական երկխոսության մեջ են»,- ասաց նա:
