Կենտրոնական բանկի խորհուրդն այսօր կայացած նիստում, որը վարում էր ԿԲ նախագահ Արթուր Ջավադյանը, հաստատել է ՀՀ ԿԲ 2011 թ. երրորդ եռամսյակի գնաճի հաշվետվությունը և ՀՀ ԿԲ 2011 թ. սեպտեմբերի 30-ի դրությամբ ֆինանսական հաշվետվությունը: Խորհուրդը հաստատել է նաև ԿԲ կողմից առևտրային բանկերի համար սահմանվող պարտադիր պահուստավորման օրացույցը և դրամավարկային քաղաքականության գործիքների տոկոսադրույքների սահմանման ժամանակացույցը:
Խորհրդի կողմից հաստատվել են ԿԲ 2012-2013 թթ. հուշադրամների թողարկման ծրագրով նախատեսված «Վահրամ Փափազյան-125» ոսկե, «Ստեփան Աղաջանյան-150», «Բենիամին Մարգարյան-100», «Արա Բեքարյան-100», «Սերգեյ Փարաջանով» արծաթե հուշադրամների դիմերեսի և դարձերեսի էսքիզները:
Խորհրդի որոշմամբ փոփոխություններ են կատարվել «Բանկերի գործունեության կարգավորումը, բանկային գործունեության հիմնական տնտեսական նորմատիվները» կանոնակարգ 2-ում:
Խորհուրդը որոշել է «ՍՓԻՆ ԹՈՓ» ՍՊԸ-ի արտարժույթի առուվաճառքի թիվ 768 լիցենզիան ուժը կորցրած ճանաչել, «ՀԱՅԲԻԶՆԵՍԲԱՆԿ» ՓԲԸ-ին տրամադրել «ԻՆՏԵԼԷՔՍՊՐԵՍ» արտասահմանյան վճարահաշվարկային համակարգում մասնակցության թույլտվություն, իսկ «ՆՈՄԻԴԻՍԿ» ՍՊԸ-ին՝ այլ վայրում ևս գրավատան կազմակերպման լիցենզիա:
ԿԲ հասարակայնության հետ կապերի ծառայությունից «Առաջին լրատվական»-ին հայտնեցին, որ ԿԲ խորհուրդը որոշել է հրապարակել ՀՀ ԿԲ 2011 թ. երրորդ եռամսյակի «Բանբեր» պարբերականը: