Ադրբեջանական ANS PRESS-ի փոխանցմամբ՝ Ադրբեջանի փոխարտգործնախարար Արազ Ազիմովը հայտարարել է, որ Ադրբեջանի տարածքում գտնվող Գաբալայի ռադիոտեղորոշիչ կայանի (ՌՏԿ) վարձակալության համար Ռուսաստանից ստացված վճարը չի համապատասխանում կայանի արժեքին ու Ադրբեջանի ռիսկերին.
«Ներկայումս Ռուսաստանը Գաբալայի ՌՏԿ-ի վարձակալության համար վճարում է տարեկան 7 միլիոն դոլար վարձավճար, ինչն ադեկվատ չէ կայանի՝ տեղեկատվական-վերլուծական կենտրոնի կարգավիճակ ունենալուն։ Մի կողմից այդ գումարը չի համապատասխանում այն արժեքին ու կարևորությանը, որը Գաբալայի ՌՏԿ-ն ներկայացնում է Ռուսաստանի շահերի համար, իսկ մյուս կողմից՝ տարածաշրջանային ու միջազգային անվտանգությանը։
Այդ պլանում Գաբալայի ՌՏԿ-ի վարձավճարը պետք է ավելացվի մի քանի անգամ։ Այլ երկրների փորձը, այդ թվում՝ նաև նմանատիպ օբյեկտներ ունեցող այլ երկրների հանդեպ Ռուսաստանի դիրքորոշումը թույլ է տալիս խոսել վարձավաճարի բազմակի բարձրացման անհրաժեշտության մասին»։
Հիշեցնենք, որ Գաբալայի ՌՏԿ-ի վարձակալության ժամկետն ավարտվում է 2012 թվականի դեկտեմբերին։ Ներկայումս Ռուսաստանն ու Ադրբեջանը մտադիր են այն երկարաձգել մինչև 2025 թվականը։ Ադրբեջանը պահանջում է վարձավճարն ավելի քան կրկնակի ավելացնել՝ հասցնելով 15 միլիոն դոլարի, սակայն Ռուսաստանը չի համաձայնում դրան, քանի որ ցանկանում է 1/3-ով կրճատել վարձակալվող տարածքը (210 հեկտարից նվազեցնելով մինչև 140-ի)՝ կայանը լիովին արդիականացնելու համար։