Այն, որ ղարաբաղա-ադրբեջանական շփման գծում կատարվող միջադեպերից հետո ադրբեջանցիների հանդեպ պետք է պատժիչ գործողություններ ձեռնարկել, և որ դրանք արդյունավետ են` հաստատ է: Այսօր կայացած մամուլի ասուլիսում այս մասին հայտարարեց քաղաքագետ Հրանտ Մելիք-Շահնազարյանը:
«Պատժիչ գործողություններն անհրաժեշտություն են: Ղարաբաղա-ադրբեջանական սահմանում հայ զինծառայողների սպանությունները եկան ապացուցելու Ադրբեջանի նախագահ Իլհամ Ալիևի` Գաբալայում հայտնած այն միտքը, որ ղարաբաղյան հակամարտությունը ակտիվ է և ոչ` սառեցված, և Ադրբեջանը պատրաստ է ռազմական ճանապարհով լուծել խնդիրը»,- նկատեց նա:
Հրանտ Մելիք-Շահնազարյանի խոսքով` սահմանին կատարվող միջադեպերի առնչությամբ միջազգային հանրությունը վաղ թե ուշ կարձագանքի:
«Ղարաբաղա-ադրբեջանական շփման գծում միջազգային ուժերի կողմից անընդհատ մոնիտորինգներ են իրականացվում: Եթե միջազգային հանրության առանձին ներկայացուցիչներ չեն անդրադառնում ադրբեջանական կողմի ցուցաբերած ագրեսիային, ապա գոնե մամուլը գրում է այդ մասին»,- նկատեց քաղաքագետը:
«Այն, որ ադրբեջանական բանակում կորուստները շատ են`միանշանակ է: Միայն այս տարվա ընթացքում ադրբեջանական լրատվամիջոցները հայտնել են 108 զոհերի մասին»,- հավելեց նա:
Ռազմական փորձագետ Արծրուն Հովհաննիսյանն իր հերթին նկատեց, որ սահմանին կատարվող սպանություններով ադրբեջանական կողմը փորձում է բարոյապես թուլացնել նախազինակոչային շրջանում գտնվող հայ ապագա զինվորներին, ստիպում վախենալ և խուսափել սահմանային դիրքերում ծառայելուց:
«Հարաբերական անդորրը մեծ լարվածության արդյունք է, հակառակորդին երբեմն պետք է հուժկու հարվածներ հասցնել»,- նկատեց նա:
Անդրադառնալով ղարաբաղյան պատերազմի վերսկսման թեմային` Մելիք-Շահնազարյանը նախ նկատեց, որ բանակցային գործընթացի ձախողումն արդյունք է Ադրբեջանի նախագահ Իլհամ Ալիևի վարած քաղաքականության:
«Չեմ կարծում, որ պատերազմի վերսկսումն այս պահին հնարավոր է: Ադրբեջանում հիանալի հասկանում են, որ չեն կարող հաջողություններ գրանցել հայերի դեմ պատերազմում: Հակառակ դեպքում չէին վարանի»,-համոզմունք հայտնեց քաղաքագետը:
Ռազմական փորձագետ Արծրուն Հովհաննիսյանն իր հերթին ավելացրեց, որ պատերազմի վերսկսման հավանականությունը միշտ կա, և այն երբեք չի կարելի բացառել:
