Ադրբեջանական APA լրատվական գործակալության փոխանցմամբ՝ Միջազգային ճգնաժամային խմբի (ICG)՝ Հարավային Կովկասի գծով ծրագրերի ղեկավար Լոուրենս Շիթսն անդրադարձել է ղարաբաղյան հակամարտության կարգավորմանը.
«Ղարաբաղյան հակամարտության հակամարտող կողմերի միջև լարվածության նվազման համար անհրաժեշտ է դիտարկել տարբեր տարբերակներ ու այլընտրանքներ, թե ինչպես առաջ շարժվել՝ չխաթարելով արդեն 17 տարի շարունակվող գործընթացը։ Անհրաժեշտ է դիտարկել այլընտրանքները, որոնք առաջ չեն քաշվել նախկինում, անհրաժեշտ են նոր մոտեցումներ։
Ներկայումս գոյություն ունեցող ստատուս քվոն երկարատև հեռանակարում չի համարվում կայուն։ Մեծ հույսեր կային՝ կապված Հայաստանի ու Ադրբեջանի նախագահների կազանյան հանդիպման հետ, սակայն այդ հանդիպումը չկարողացավ բեկում մտցնել ԵԱՀԿ Մինսկի խմբի շրջանակներում անցկացվող բանակցային գործընթացում, ինչի արդյունքում վերջինս զգալիորեն դանդաղեց։
Դրա հետ մեկտեղ, հակամարտող կողմերը շարունակում են սպառազինությունների մրցավազքը, ռազմաշունչ հռետորիկան, ինչը շարունակում է «բարձրացնել շառավիղը» հակամարտող կողմերի միջև։ Ռազմական գործողությունների վերսկսումը կարող է հանգեցնել ընդհանուր տարածաշրջանային հակամարտության։
Նախ մի կողմից Ռուսաստանը պարտավորություններ է ստանձնել Հայաստանի առջև, իսկ մյուս կողմից՝ Թուրքիան Ադրբեջանի առջև։ Իրանն էլ երկայնաձիգ սահման ունի Հայաստանի ու Ադրբեջանի հետ։ Անհնար է կանխատեսել, թե ինչ չափով Իրանը կներգրավվի դրանում, սակայն ակնհայտ է, որ նա չի կարող ամբողջովին անտեսել իր սահմաններին ընթացող զինված հակամարտությունը։
Բացի այդ, պետք է ուշադրություն դարձնել այն հանգամանքին, որ հակամարտող կողմերը ներկայումս ունեն շատ ավելի մեծ սպառազինություն, քան՝ 1994 թվականին։ Ընդ որում՝ դա վերաբերում է թե՛ հարձակողական, թե՛ պաշտպանական սպառազինությանը»։
