Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին տեղեկացնում են, որ ՀՀ փոխվարչապետ, տարածքային կառավարման նախարար Արմեն Գևորգյանն այսօր այցելել է Արարատի մարզի Վերին Արտաշատ և Նորաշեն համայնքներ:
Համայնքերում մարզի առաջնահերթ խնդիրների լուծման ծրագրի առաջին մասով վերանորոգվել են դպրոցները, Վերին Արտաշատում` նաև մանկապարտեզը:
Փոխվարչապետը ծանոթացավ կատարված աշխատանքներին:
Մարզի առաջնահերթ խնդիրների լուծման ծրագրի առաջին և երկրորդ մասերի իրականացմանն առնչվող հարցերին առնչվող քննարկումներին մասնակցել են Տարածքային կառավարման նախարարության և մարզպետարանի պատասխանատուները:
Փոխվարչապետին զեկուցվել է, որ ծրագրի առաջին մասով աշխատանքները հիմնականում կատարվել են. դրանում ընդգրկված 84 ծրագրերից աշխատանքներն արդեն ավարտվել են 82-ում, իսկ Մասիսի թիվ 7 մանկապարտեզը սնող գազատարի կառուցման և Վեդու մշակույթի տան հիմնանորոգման` ծրագրի առաջին մասով նախատեսված աշխատանքները կավարտվեն մինչեւ դեկտեմբերի 1- ը:
Երկրորդ մասում ընդգրկված 41 ծրագրերից սկսվել և ընթացքի մեջ են 8-ի աշխատանքները: Ծրագրի երկրորդ մասով մարզի համայնքներում հիմնականում վերանորգվելու են կրթական, առողջապահական հաստատություններ, ներհամայնքային ճանապարհներ:
Բացի վերանորոգման աշխատանքներից, իրականացվելու են նաև խոշոր ծրագրեր, օրինակ` Այնթապում կկառուցվի նոր մանկապարտեզ, կմաքրվի Արտաշատի քաղաքային` ճահիճի վերածված լիճը և կբարեկարգվի հարակից տարածքը:
Խորհրդակցությանը ներկայացվել են նաև մարզի համայնքային բյուջեների 2011թ. տասն ամիսների կատարողականի ցուցանիշները:
Նոյեմբերի 1-ի դրությամբ Արարատի մարզի համայնքների բյուջեների փաստացի մուտքերը նախատեսված 3,6 մլրդ դրամի դիմաց կազմել են 3, 5 մլրդ դրամ (կատարողականը` 95.9%): Սեփական եկամուտների կատարողականը կազմել է 91.8%, հավաքագրման մակարդակը 2010թ. նույն ժամանակահատվածի համեմատ աճել է 2,2 %-ով:
Որոշակի նվազում է արձանագրվել գույքահարկի հավաքագրման մասով. կատարողականը կազմել է 78 %` 2010թ. նույն ժամանակահատվածի համեմատ նվազելով 1.1 %-ով:
Այս հարկատեսակի հավաքագրման մասով հիմնականում նվազում է նկատվում Արտաշատ, Վեդի, Այգեստան, Արալեզ, Արգավանդ, Գեղանիստ, Հովտաշատ, Նիզամի, Նորաշեն, Մարմարաշեն, Նոր Ուղի, Ջրաշեն, Սայաթ-Նովա, Վանաշեն համայնքներում:
Փոխվարչապետն ընդհանուր առմամբ դրական համարել հավաքագրման տեմպերը:
Փոխվարչապետին զեկուցվել է նաև մարզում գյուղատնտեսական իրավիճակի մասին: Տեղեկացվել է, որ ավարտին են մոտենում աշնանացանի աշխատանքները: Արդեն մոտ 4100 հա հողատարածքում ցանք է կատարվել, որը նախորդ տարվա ցուցանիշը գերազանցում է 125 հեկտարով:
Մարզում այս տարի արտադրվել է 94600տ խաղող` 1281տ-ով ավելի, քան նախորդ տարի, մթերվել է 67687,7տ, որի դիմաց վճարումները կատարվել են 90%-ով: Արտադրված 26 300տ ծիրանի մեծ մասն արտահանվել է ՌԴ: Նշվեց, որ բերքի սպառման հարցում խնդիրներ չեն առաջացել:
Պահածոների գործարանների կողմից մթերվել է 26614տ բանջարեղեն եւ 486.8տ պտուղ, գյուղացիական տնտեսություններին վճարվել է մթերված բերքի գումարի 85%-ը:
Ներկայացվել է նաև համայնքների գլխավոր հատակագծերի, համայնքների հողերի գոտիավորման և օգտագործման սխեմաների կազմման ընթացքը:
Տեղեկացվել է, որ այս տարի սկսվել է Մասիս և Այգավան համայքների գլխավոր հատակագծերի մշակման գործընթացը:
Ա. Գևորգյանը մարզպետին հանձնարարել է համայնքի ղեկավարներին հորդորել աշխատանքները կազմակերպել համաձայն ՀՀ քաղաքաշինության նախարարության հետ ձեռք բերված պայմանավորվածությունների:
Անդրադարձ է կատարվել նսև մարզի համայնքներում զորակոչիկների հաշվառման ընդհանուր իրավիճակին, ինչպես նաեւ զորահավաքային նախապատրաստության հետ կապված հարցերին:
Արարատի մարզում ևս փոխվարչապետն առանձին խորհրդակցություն է անցկացրել Արդարադատության նախարարության իրավաբանական անձանց պետական ռեգիստրի գործակալության, ԿԱ անշարժ գույքի կադաստրի պետական կոմիտեի տարածքային ստորաբաժանումների, Ճանպարհային ոստիկանության հաշվառման քննական բաժինների ղեկավարների մասնակցությամբ:
