News Georgia-ի փոխանցմամբ՝ ԱՄՆ ռազմածովային ուժերի նախարար Ռեյ Մաբուսը նոյեմբերի 18-19-ը այցելելու է Վրաստան։ Այս մասին հայտարարել է Վրաստանում ԱՄՆ դեսպանատան մամլո ծառայությունը։
Վրաստանում նա հանդիպումներ է ունենալու կառավարության և պաշտպանության նախարարության բարձրաստիճան ներկայացուցիչների հետ։ Այդ հանդիպումներում կողերը քննարկելու են անվտանգության ոլորտում երկկողմանի համագործակցությանն առնչվող հարցեր։
Նշվում է, որ Մաբուսը պատասխանատու է այն ծրագրերի ու քաղաքականության իրագործման համար, որոնք համաձայնեցվում են ԱՄՆ նախագահի կամ պաշտպանության նախարարի կողմից կանխորոշված ԱՄՆ ազգային անվտանգության քաղաքականության հետ։
Ամերիկյան ռազմածովային գերատեսչությունը բաղկացած է երկու կառույցից, ռազմածովային ուժերից ու ծովային հետևակի կորպուսից։
Հիշեցնենք, որ ավելի վաղ Ադրբեջանում ԱՄՆ-ի դեսպանատունը հայտարարել էր, որ Ռեյ Մաբուսը նոյեմբերի 20-21-ը ժամանելու է Ադրբեջան։
