Ադրբեջանական Vesti.az-ի փոխանցմամբ՝ գերմանական հանրահայտ ProSieben հեռուստաալիքն իր «Նախագահ» հաղորդաշարի այսօրվա համարը նվիրել է Ադրբեջանի նախագահ Իլհամ Ալիևին.
«Նա նման է գրոսմայստերի, նրա քաղաքականությունը կարծես շախմատային խաղատախտակ լինի։ Ինքնավստահ Ալիևը շատ նրբորեն ու իմաստուն ձևով իր կախվածության տակ է պահում ողջ տարածաշրջանը։ Նա չի պատրաստվում զիջումների գնալ Ղարաբաղի հարցում և միջազգային արենայում վստահեցրել է, որ չի զիջելու ոչ մի թիզ ադրբեջանական հող։ Ալիևը շատ խելացի ու հեռատես քաղաքական գործիչ է։
Կանննի՝ G-20-ի գագաթնաժողովի շրջանակներում տեղի ունեցած Սարկոզի-Օբամա հանդիպման ժամանակ Սարկոզին պատմել է վերջերս Հարավային Կովկաս կատարած իր շրջագայության մասին։ Սարկոզին Ալիևի հետ հանդիպման ժամանակ փորձել է նրան հետ պահել Հայաստանի դեմ ռազմական գործողություններից, սակայն Ալիևը պնդել է իրենը։ Սարկոզին Օբամային հայտնել է, որ շատ դժվար է հակազդել Ալիևին, նա կարծես Ալեքսանդր Մակեդոնացին լինի»։
Գերմանական հեռուստաալիքը հայտնել է, որ արդեն 2012 թվականին Ադրբեջանն ակտիվ ռազմական գործողություններ է սկսելու Հայաստանի դեմ։
