ՀՅԴ բյուրոն կոչ է անում աշխարհասփյուռ հայությանը` մասնակցել «Հայաստան» համահայկական հիմնադրամի հանգանակությանը:
Ստորև ներկայացնենեք ՀՅԴ բյուրոյի տարածած կոչը.
«Արդեն սկսվել է «Հայաստան» համահայկական հիմնադրամի տարեկան դրամահավաքը` Հայաստանում և Սփյուռքում: Այն պետք է եզրափակվի նոյեմբեր 24-ին Միացյալ Նահանգների տարածքում կազմակերպվող հեռուստամարաթոնով:
Այս տարվա հասույթը, նախորդի նման, պետք է հատկացվի Հայաստանի սահմանամերձ գյուղերի և ԼՂՀ զարգացման ծրագրերին:
«Հայաստան» հիմնադրամի նման համահայկական կառույցները, անկախ իրենց հետապնդած անմիջական ու մասնագիտական նպատակից, ունեն խորհրդանշական խոր նշանակություն: Նրանց գոյությունն ու կենսունակությունը նաև իրողական փաստն է համայն հայության միասնականության, և միացման եզրը կազմող տարասփյուռ հայության բազում ու բազմատեսակ հատվածների:
Միաժամանակ, անհրաժեշտ է հաստատել, որ հայության համազգային նպատակների իրականցման տեսանկյունից անգնահատելի է Հայաստանի և Արցախի Հանրապետությունների ամրապնդումը:
Հայաստանի սահմանամերձ գյուղերն ու Արցախի հայությունը երաշխավորն են ամբողջ Հայաստանի ապահովության ու զարգացման: Հետևաբար, այդ շրջաններում ներդրումը հետապնդում է համահայկական նպատակներ:
Ուստի, կոչ ենք ուղղում հայության բոլոր մասնիկներին` մեծ թվով և լիաբուռն կերպով մասնակցել «Հայաստան» համահայկական հիմնադրամի հանգանակությանը»:
