Հարավաֆրիկյան հանրապետության Փրի-Ստեյն գավառում Համֆրի մականունով տնային գետաձին սպանել է իր տիրոջը, որը մի քանի տարի շարունակ պահում էր նրան: Միջադեպը տեղի է ունեցել նոյեմբերի 12-ին, երբ կենդանին իր 40-ամյա տիրոջը` Մարիուս Էլսին, քաշել է ջուրը` թույլ չտալով դուրս գալ:
Ինչպես հայտնում է korrespondent.net-ը, Էլսը Համֆրիին որդեգրել էր մի քանի տարի առաջ: Գետաձիուն փրկել էին ջրհեղեղի ժամանակ, երբ նա դեռ փոքր էր: Համֆրին այս ընթացքում ընտելացել էր մարդկանց, և այլևս չէր թույլատրվում նրան կրկին ազատ արձակել բնություն, քանի որ նա ինքնուրույն չէր կարող ապրել:
Հարավաֆրիկացին գետաձիու հետ մի քանի տեղական պարբերականների և օտարերկրյա մամուլի հերոսն էր: Էլսը և Համֆրին լրագրողներին ցուցադրում էին իրենց ջերմ հարաբերությունները: Էլսը գետաձիուն կերակրում էր մրգերով, շոյում էր նրան, մաքրում ատամները:
Թե ինչն է եղել տիրոջ վրա հարձակվելու պատճառը, հայտնի չէ: Էլսի հարևանները և իրավապահ մարմինների աշխատակիցները վստահեցնում են, որ Էլսին բազմիցս զգուշացրել են կենդանու հետ նման սերտ հարաբերություններ չունենալ:
Տիրոջ վրա հարձակումից հետո Համֆրին սպանվել է: Նա 6 տարեկան էր: Այդ տարիքում գետաձիերի մոտ սկսվում է սեռական հասունացումը: Նրանք ապրում են 30-40 տարի: Բնության մեջ գետաձիերն ապրում են խմբերով, որոնք գլխավորում են հասուն արուները, չնայած լինում են դեպքեր, երբ էգերն ապրում են մենակ:
