Չինաստանի Ժողովրդական Հանրապետությունը, որը երկար ժամանակ չէր կողմնորոշվում Եվրամիությանը ճգնաժամի դեմ պայքարում օգնություն ցուցաբերելու հարցում, այժմ դրա համար երեք պայման է առաջ քաշել. իրեն ավելի մեծ ազդեցություն տալ Արժույթի միջազգային հիմնադրամում, բարձրացնել իր տնտեսական կարգավիճակը Առևտրի համաշխարհային կազմակերպությունում և հանել Պեկինին եվրոպական զենքի մատակարարման էմբարգոն: Սակայն, ինչպես հաղորդում է РБК daily-ն, Եվրոպայի համար այս պայմանները ստորացուցիչ և վտանգավոր են։
Դեռ բոլորովին վերջերս ներդրողները հավատում էին, որ Չինաստանը կօգնի եվրոգոտուն` սկսելով գնել խնդիրներ ունեցող երկրների պետական պարտատոմսերը: Չինաստանի Կենտրոնական բանկի արժութային քաղաքականության հանձնաժողովի ներկայացուցիչ Լի Դաոկույը նոյեմբերի սկզբին հայտարարել էր, որ Պեկինը պատրաստ է տարածաշրջանին տրամադրել 100 մլրդ դոլար, իհարկե՝ որոշակի պայմանների կատարման դիմաց: Սակայն գրեթե միևնույն ժամանակ հայտարարություն տարածվեց, որ Չինաստանը ներդրում կունենա ոչ թե ուղղակիորեն Եվրոպական կայունացման հիմնադրամում, այլ ԱՄՀ-ի միջոցով: Իսկ G20-ի գագաթնաժողովի նախօրեին Չինաստանի առաջնորդ Հու Ցզինտաոն հայտարարեց, որ «Եվրոպան ի վիճակի է ինքնուրույն հաղթահարել դրությունը»:
Փորձագետները նշում են, որ Չինաստանի կողմից պայմաններ առաջ քաշելը միանգամայն բացատրելի է, քանի որ այժմ եվրոպական նախագծերին մասնակցելը մեծ համարձակություն է պահանջում: Սակայն տնտեսական բանակցություններին միանում է մեծ քաղաքականությունը:
«Մենք ցանկանում ենք օգնել, բայց մենք բարեգործական կազմակերպություն չենք,- ասել է Reuters-ի անանուն աղբյուրը:- Երբ ԱՄՆ-ը և ԱՄՀ-ը օգնություն են առաջարկում դժվարություններ ունեցող երկրներին, նրանք որոշակի պայմաններ են առաջ քաշում։ Եվ տրամաբանական է, որ Չինաստանն էլ նույն բանն է անում»: Եվրոպային չինական օպորտունիզմը դուր չի եկել, և բանակցությունները փակուղի են մտել:
Չինաստանի առաջ քաշած պայմանները պարզ են թվում միայն առաջին հայացքից: Նախ՝ Չինաստանը ցանակնաւոմ է մեծացնել իր ազդեցությունը Արժույթի միջազգային հիմնադրամում, ինչպես նաև արագացնել յուանի ներգրավումը SDR զամբյուղ, որի մեջ այժմ մտնում է 4 արժույթ (դոլար, եվրո, իեն, ֆունթ): Պեկինի դերի մեծացումը չի բխում ԵՄ-ի և ԱՄՆ-ի շահերից, որոնք կարող են վետո դնել հիմնադրամի առանցքային որոշումների վրա: Չինական արժույթի ներթափանցմամբ կընկնի դոլարի դերը: ՙ
Ինչ վերաբերում է զենքի մատակարարման էմբարգոն հանելուն՝ Ֆրանսիան և Գերմանիան ավելի վաղ կողմ էին արտահայտվել դրան, մինչդեռ Նիդերլանդները և Շվեդիան օգտվել էին վետոյի իրենց իրավունքից:
Այնուամենայնիվ, փորձագետները չեն հասկանում, թե ինչու է Եվրոպան շարունակում ընդդիմանալ: «Չինաստանը շուկայական տնտեսության մեջ չճանաչելը միանգամայն տարօրինակ կլինի: Մի դեպքում՝ դուք Չինաստանը ճանաչում եք որպես լիիրավ առևտրական գործընկեր, իսկ մեկ այլ դեպքում` ոչ: Դա արդարացի չէ: ԱՄՀ-ում ՉԺՀ-ի կարգավիճակի բարձրացումը նույնքան արդարացի կլիներ»,- կարծիք են հայտնել Oxford Analityca-ի տնտեսական փորձագետները: