Իրանի հանդեպ միջազգային ճնշումների ֆոնին ճիշտ կլինի, որ Հայաստանը չեզոքություն պահպանի, որքան էլ դա դժվար է: Այսօր կայացած մամլո ասուլիսի ժամանակ այս մասին հայտարարեց իրանագետ Մհեր Բաղդասարյանը: Նրա խոսքով՝ գտնվելով շրջափակման մեջ, Հայաստանի տարածաշրջանային միակ գործընկերը Իրանն է:
«Ինչ վերաբերում է Իրանի հանդեպ Արևմուտքի ճնշումներին առհասարակ, ապա իսլամական պետության գոյության 32 տարիներին այդ երկիրը Արևմուտքում ընկալվում է որպես թշնամի, և հակառակը՝ Իրանի հետ թշնամի են համարում Արևմուտքին: Միաժամանակ, ԱՄՆ-ի կոպիտ դիրքորոշումն Իրանի հանդեպ այսօրվա դրությամբ որոշակիորեն մեղմացել է: Դրա վկայությունը կարելի է համարել ամերիկյան կողմի վերջին հայտարարությունները, որոնք բացառում են այդ երկրի հանդեպ ռազմական ցանկացած ագրեսիա»,- նշեց իրանագետը: Այնուհետև նա հավելեց, որ Իրանը տարածաշրջանային գերտերություն դառնալու լուրջ հավակնություններ ունի, քանի որ ունի դրա համար անհրաժեշտ բոլոր նախադրյալները:
«Արևմտյան փորձագետները իրավացիորեն նշում են, որ Իրանի դեմ ռազմական գործողությունները կարող են բերել նավթի գնի բարձրացման, բացի այդ՝ Իրանի վրա հարձակումները հենց այնպես չեն ավարտվի`Իրանը թույլ չի տա, որ որևէ երկիր ոտնձգություն կատարի իր դեմ»,- ասաց Մհեր Բաղդասարյանը:
Ասուլսիսին ներկա թուրքագետ Անդրանիկ Իսպիրյանը նկատեց, որ Իրանի դեմ պատժամիջոցներ կիրառող հանրությունը լավ է հասկանում, որ Հայաստանը Իրանի մասով այլընտրանք չունի, և որ Իրանն է Հայաստանի տարածաշրջանային իրական հարևանը:
