Грузия Online-ի փոխանցմամբ՝ Վրաստանում գտնվող ՆԱՏՕ-ի գլխավոր քարտուղար Անդերս Ֆոգ Ռասմուսենն Աֆղանստանից վրացական 33-րդ գումարտակի վերադարձի կապակցությամբ կազմակերպված հանդիսավոր միջոցառման ժամանակ հայտարարել է որ աֆղանական կամպանիային մասնակցելը Վրաստանին հավելյալ հնարավորություններ է ընձեռում ՆԱՏՕ-ին անդամակցելու համար.
«Աֆղանստանում գործող Միջազգային անվտանգության աջակցության ուժերի (ISAF) կազմում ներառված վրաց զինծառայողները ոչ միայն օգնում են Աֆղանստանում միջազգային անվտանգության ապահովման հարցում, այլև հավելյալ հնարավորություն են ստեղծում ՆԱՏՕ-ին Վրաստանի անդամակցության համար։
Վրաստանը կարող է հպարտանալ իր զինվորականներով, որոնք միջազգային անվտանգություն են ապահովում Աֆղանստանում։ Այդ երկիրը երբեք չի դառնա ահաբեկիչների ապաստանը, և ես դրա համար շնորհակալ եմ ձեզ։ Աֆղանստանում բարձր մակարդակով ծառայում է մոտ 1000 վրացի զինծառայող, որոնք աչքի են ընկել իրենց քաջությամբ»։
Վրաստանի պաշտպանության նախարար Բաչո Ախալայան իր հերթին ընդգծել է, որ 2012 թվականին Վրաստանը ևս մեկ գումարտակ է ուղարկելու Աֆղանստան։ Ախալայան հույս է հայտնել, որ Ռասմուսենի վրացական այցը կնպաստի Վրաստանի ու ՆԱՏՕ-ի մերձեցմանը։
Հիշեցնենք, որ Վրաստանը ISAF-ի գործողություններում ներգրավվել է 2009 թվականից։ Մինչ 33-րդ գումարտակի վերադարձը, Աֆղանստանում էին գտնվում 925 վրացի խաղաղապահներ։ Նրանց դասակը (175 զինվոր ու սպա) տեղակայված էր Քաբուլ քաղաքում՝ Ֆրանսիայի պատասխանատվության գոտում, իսկ գումարտակը (749 մարդ)՝ Հիլմենդ նահանգում՝ ԱՄՆ պատասխանատվության գոտում։
Ավելի վաղ նշվում էր, որ 2012 թվականին Աֆղանստանում գտնվող վրացի զինծառայողների թվաքանակը հասնելու է 1500-ի, որով և Վրաստանը պետք է դառնա ՆԱՏՕ-ի անդամ չհանդիսացող երկրներից Աֆղանստանում ամենամեծ զինվորական կոնտինգենտն ունեցող երկիրը։
Սեպտեմբերի սկզբին Աֆղանստանում զոհվել է 10-րդ վրացի զինծառայողը։ Ընդհանուր առմամբ, Աֆղանստանում վիրավորվել է ավելի քան 20 վրացի զինծառայող։