Ռուսական Regnum լրատվական գործակալության փոխանցմամբ՝ ԱՄՆ-ը համաձայնել է Թուրքիային հանձնել F-16 Fighting Falcon կործանիչների ծրագրային ապահովման ծածկագրերը։ Դրա շնորհիվ թուրքական կողմը հնարավորություն կստանա այդ ինքնաթիռների վրա տեղակայել հավելյալ սարքավորում և սեփական արտադրության սպառազինություն։
Թուրքիան մտադիր է արդիականացնել իր զինված ուժերում առկա F-16 տիպի բոլոր 213 կործանիչները։ Այդ նպատակով յուրաքանչյուր ինքնաթիռի վրա պետք է ծախսվի 5.2 միլիոն դոլար՝ ներառյալ թուրքական համակարգերի և բաղադրատարրերի տեղակայումը։
Ընդհանուր առմամբ, F-16 կործանիչների արդիականացման նախագիծը գնահատվում է 1.1 միլիարդ դոլար։ Բացառված չէ, որ թուրքական զենքով ու բաղադրատարրերով կհամալրվեն F-16 Block 50 տիպի 30 ինքնաթիռներ, որոնք Թուրքիան 1.8 միլիարդ դոլարով գնել է դեռևս 2007 թվականին։
Հեռանկարում Թուրքիան փաստացիորեն կարող է ձեռնամուխ լինել F-16 կործանիչների արտադրության, սպասարկման, արդիականացման ու վերամշակման ողջ փուլին։
2006 թվականին ԱՄՆ Կոնգրեսը հավանության էր արժանացրել Թուրքիայում տեղական ռազմաօդային ուժերի համար նախատեսված F-16 կործանիչների հավաքումը։ Թուրքական Turkish Aerospace Industries ընկերությունն Անկարայի գործարանում հավաքված առաջին F-16 Block 50-ը երկրի ռազմաօդային ուժերին է հանձնել 2011 թվականի մայիսի վերջին։
Այս համաձայնագրի շնորհիվ Թուրքիան կարող է գումարներ տնտեսել F-16 կործանիչների արդիականացման հարցում։ Ներկայումս Թուրքիան կարող է արտադրել տարբեր տիպի ռազմական արտադրանք, որն ապահովում է նրա զինված ուժերի կարիքների կեսը։ Ներկայումս Թուրքիան զբաղված է նաև Պակիստանի զինված ուժերում առկա F-16 կործանիչների արդիականացմամբ։
Հիշեցնենք, որ ներկայումս մի խումբ կոնգրեսականներ ԱՄՆ Կոնգրեսի դիտարկմանն են ներկայացրել թիվ 83 բանաձևը, որով Վաշինգտոնին կոչ են անում զենք չվաճառել Թուրքիային, ինչը մասնավորապես վերաբերում է վերջին օրերին շրջանառության մեջ մտած ամերիկյան 3 AH-W1 «Սուպեր Կոբրա» ուղղաթիռներին։
Կոնգրեսականներն իրենց որոշումը հիմնավորել էին այսպես. «Թուրքիան սպառնում է Իսրայելին, շարունակում է օկուպացրած պահել Հյուսիսային Կիպրոսը, Հայաստանին ուժեղ շրջափակման է ենթարկել։ Անկարան այսպես է վերաբերվում մեր բարեկամներին ու դաշնակիցներին, միևնույն ժամանակ, մեր ամենահայտնի թշնամիների հետ սերտ կապեր է հաստատել։ Թուրքիային զենք վաճառելիս Վաշինգտոնը պետք է հաշվի առնի այս մտահոգությունները»։