Грузия Online-ի փոխանցմամբ՝ Վրաստանի ԱԳՆ-ն իր բողոքն է հայտնել Սուխումի և Մոսկվայի միջև ընթացող բանակցությունների վերաբերյալ, որոնք առնչվում են ռուս-աբխազական պետական սահմանի սահմանազատմանը։
Վրաստանի ԱԳՆ-ի տարածած հայտարարության մեջ նշված է. «2011 թվականի նոյեմբերի 8-ին ԶԼՄ-ները տեղեկատվություն են տարածել, որ օկուպացված Սուխումում (Աբխազիա, Վրաստան) ընթանում է Ռուսաստանի և Աբխազիայի օկուպացիոն ռեժիմի ներկայացուցիչների երրորդ հանդիպումը, որում քննարկվում է Ռուսաստանի Դաշնության ու Աբխազիայի Հանրապետության միջև պետական սահմանի սահմանազատման ու ծովային տիրույթների հստակեցման հարցը։
Այս կապակցությամբ Վրաստանի ԱԳՆ-ը հայտարարում է, որ միջազգային իրավական տեսանկյունից օկուպանտ երկրի և նրա իսկ կողմից ստեղծված օկուպացիոն ռեժիմի միջև ընթացող այդօրինակ բանակցություններն ապօրինի են, և նրանց միջև ձեռք բերված համաձայնագիրը չի ունենա որևէ իրավական հետևանք։
Վրաստանի պետական սահմանի (թե՛ ցամաքային, թե՛ ծովային) սահմանազատման ու սահմանագծման մասին բանակցություններ կարող է վարել միայն Վրաստանի կենտրոնական իշխանությունը»։
Հիշեցնենք, որ ռուս-աբխազական սահմանի սահմանազատման վերաբերյալ երկրորդ հանդիպումը տեղի է ունեցել այս տարվա մարտի 29-31-ը Մոսկվայում։ Այն ժամանակ հայտարարվել էր, որ այդ հանդիպումն անցել է կառուցողական ոգու և փոխըմբռնման մթնոլորտում։