«Անզսպելիները-2» (Expendables 2) ֆիլմի նկարահանումների ժամանակ կասկադյորներից մեկը մահացել է, երկրորդը` ստացել լուրջ վնասվածքներ: Այս մասին տեղեկացնում է Reuters գործակալությունը:
Դժբախտ պատահարը տեղի է ունեցել «Օգնյանովո» ջրամբարում` Բուլղարիայի մայրաքաղաք Սոֆիայից քիչ հեռու, երբ պատռվել է փչովի նավակը, որի մեջ գտնվել են կասկադյորները:
Տեղի ոստիկանությունը հետաքննում է նկարահանող խմբի անդամների հետ տեղի ունեցածը:
Անհաջող հնարքը, որը ողբերգական ավարտ ունեցավ կասկադյորներից մեկի համար, իրականացվել է հինգշաբթի օրը, սակայն Nu Image/Millennium Films պրոդյուսերական ընկերությունն այդ մասին տեղեկացրել է միայն ուրբաթ: Ընկերությունը ցավակցություն է հայտնել մահացածի ընտանիքին ու տուժածին:
«Անզսպելիները-2»-ում գլխավոր դերակատարների թվում են Առնոլդ Շվարցենեգերը, Սիլվեսթեր Ստալոնեն, Ջոն Տրավոլտան, Բրյուս Ուիլիսը, ինչպես նաև այլ հայտնի դերասաններ:
«Անզսպելիները-2»-ը 2010 թ. էկրան բարձրացած ֆիլմի շարունակություն է: Սիքվելի բեմադրմամբ զբաղվում է Սայմոն Ուեսթը: