Այսօր Հանրային խորհուրդը կազմակերպեց քննարկում կրպակների ապամոնտաժման հարցի վերաբերյալ: Քննարկմանը ներկա էին կրպակատերերի պաշտպանության կազմկոմիտեի անդամները, ԱԺ «Ժառանգություն» խմբակցության պատգամավոր Ստեփան Սաֆարյանը, Հանրային խորհրդի ներկայացուցիչները և կրպակատերերը:
Բացման խոսքով հանդես եկավ Արշակ Սադոյանը, որը նշեց, որ պետք է քննարկումներ սկսել քաղաքապետարանի ներկայացուցիչների հետ: «Այսօր կրպակատերերի ապրելու հարցն է դրված, պետք է միջոցներ ձեռնարկել, որպեսզի մարդիկ չկորցնեն իրենց աշխատանքը: Խնդիրն իսկապես բավական լուրջ է, ցավոք: Մենք ուսումնասիրել ենք կրպակների ապամոնտաժման հարցը. այս ամենը բերում է նրան, որ նվազում է ձեռներեցության ոգին, աճում է գործազրկությունը, կբերի սոցիալական պայմանների վատթարացմանը, և սոցիալական լարվածություն կառաջնա»,- մեկնաբանեց Ա. Սադոյանը` հույս հայտնելով, որ քաղաքապետարանի աշխատակիցները նույնպես կհասկանան խնդրի էությունը և լրջությունը:
Հանրային խորհրդի անդամն առաջարկեց կրպակատերերի կազմկոմիտեի անդամներից ձևավորել բանակցային կողմ, որը խնդիրը կքննարկի քաղաքապետարանի աշխատակիցների հետ: Աա է Արշակ Սադոյանի և Հանրային խորհրդի դիրքորոշումը, որի արդյունքում, Ա. Սադոյանի համոզմամբ, երկու կողմերն էլ կշահեն:
Առաջարկին արձագանքեց ԱԺ «Ժառանգություն» խմբակցության պատգամավոր Ստեփան Սաֆարյանը, որը համոզմունք հայտնեց, թե պետք չէ կրպակատերերին զրկել ապրուստի միակ միջոցից:
Հանրային խորհրդի կազմակերպած քննարկմանը կրպակատերերի իրավունքները ներկայացրեց կազմկոմիտեի նախագահ Արևիկ Ղազարյանը: Նա կրպակատերերին աշխատանքից զրկելու որոշումը հանցագործություն որակեց: «Այս որոշումը կրպակատերերին կանգնեցրել է փաստի առջև, ստիպված եմ քննադատել այս որոշումը. կան դեպքեր, երբ կրպակը քաղաքացու եկամտի միակ աղբյուրն է: Աշխատանք ունեցողին աշխատանքի հնարավորությունից զրկելը անընդունելի է»,- ամփոփեց իր խոսքը Արևիկ Ղազարյանը:
Հանրային քննարկմանը իրենց մտահոգություններով Արշակ Սադոյանի հետ կիսվեցին կրպակատերեր և խնդրով մտահոգված գործիչներ: