Warner Bros.-ը նախատեսում է նկարահանել Շերլոկ Հոլմսի մասին պատմող երրորդ ֆիլմը` մասնակցությամբ Ռոբերտ Դաունի-կրտսերի և Ջուդ Լոուի:
Ընկերությունը որպես ապագա ֆիլմի սցենարիստ է ընտրել Դրյու Պիրսին, որը ներկայումս աշխատում է «Երկաթե մարդը-3» ֆիլմի սցենարի վրա, որի գխավոր հերոսին մարմնավորելու է նույն Դաունի-կրտսերը:
Շերլոկ Հոլմսի մասին Warner Bros.-ի երկրորդ ֆիլմը դեռ դուրս չի եկել վարձույթի: Ժապավենը «Ստվերների խաղը» խորագրով էկրան դուրս կգա 2011 թ. դեկտեմբերին:
Դաունի-կրտսերը ֆիլմում մարմնավորելու է գլխավոր դերակատարին, Լոուն` բժիշկ Վաթսոնին:
Գլխավոր ախոյանին` պրոֆեսոր Մորիարտին, մարմնավորելու է Ջարեդ Հարրիսը: Բացի այդ` ֆիլմում ընդգրկված են Ռեյչել Մակ-Ադամսը, Նումի Ռապասը և Սթիվեն Ֆրայը: «Շերլոկ Հոլմս-2»-ի, ինչպես և դրա նախորդի ռեժիսորն է Գայ Ռիչին:
Ռիչիի` Շերլոկի մասին առաջին ֆիլմն էկրան է դուրս եկել 2009 թ. դեկտեմբերին` հավաքելով 524 միլիոն դոլար այն դեպքում, երբ ֆիլմի բյուջեն 90 միլիոն դոլար էր:
