Ռուսական Regnum լրատվական գործակալության փոխանցմամբ՝ բրիտանական The Guardian պարբերականն անդրադարձել է Ադրբեջանում ժողովրդավարության խնդրին։ Իր հոդվածում Մարի Ֆիցջերալդը գրում է.
«Բաքվի կողմից առաջ քաշված «Մեր ուղին ժողովրդավարությունն է» կարգախոսն անգամ ամենալայն վերլուծության դեպքում չի համապատասխանում իրականությանը, քանի որ ժողովրդավարությունը հանդիսանում է ադրբեջանական իշխանությունների PR կամպանիայի միայն մի մասը։
Ադրբեջանը ձեռնամուխ է եղել խոշոր PR կամպանիայի իրականացմանը։ Ադրբեջանի ներկայիս նախագահ Իլհամ Ալիևը նախկին նախագահ Հեյդար Ալիևի որդին է, այսինքն՝ Ալիևների ընտանիքն Ադրբեջանը ղեկավարում է 1993 թվականից։ Իլհամ Ալիևն անգամ չի մտահոգվում իր հյուսիսային հարևան Վլադիմիր Պուտինի օրինակով ձևականորեն վարչապետական պաշտոնին անցում կատարելու մասին։
2009 թվականին նա հանրաքվեի միջոցով առանց որևէ խնդրի վերացրեց երկու անգամից ավելի նախագահ ընտրվելու վրա դրված սահմանափակումը։ Միջազգային դիտորդները կտրուկ քննադատել են Ադրբեջանի անկախացումից ի վեր այդ երկրում անցկացված բոլոր ընտրությունները։
Ընդդիմության ցույցերի դեմ բազմիցս ուժ է կիրառվել, բանտերում տարածված են կտտանքներն ու դաժանությունները։ Նախորդ տարի «Լրագրողներ առանց սահմանների» (RSF) կազմակերպությունը հայտնեց, որ ադրբեջանցի լրագրողներն ու բլոգերներն աշխատում են տեղական անպատժելիության ու իշխանությունների կողմից մշտական ճնշումների պայմաններում։
Ներկայումս բազմաթիվ ակտիվիստներ հացադուլ են հայտարարել՝ որպես բողոքի նշան այս տարվա ապրիլին ընդդիմության ցույցերին մասնակից ակտիվիստների նկատմամբ կայացրած խիստ դատավճիռների։ Եվրախորհրդարանի նախագահ Եժի Բուզեկն ապրիլին ադրբեջանական իշխանություններին կոչ արեց ազատ արձակել բոլոր քաղբանտարկյալներին, սակայն դա անարձագանք մնաց։
Մենք չենք կարող աչք փակել էներգակիրներով հարուստ Ադրբեջանում տեղի ունեցող դեպքերի վրա միայն նրա համար, որ դա մեզ ձեռք է տալիս։ Պատմությունը ցույց է տվել, որ այդպիսի ռազմավարությունը հաճախ վատ ավարտ է ունենում նաև արևմտյան ռեժիմների համար։ Մենք պետք է միևնույն չափորոշիչներով դատապարտենք բոլոր ենթադրյալ «ժողովրդավարությունները», այդ թվում՝ նաև մերը (Մեծ Բրիտանիա)»։