Թուրքական Zaman թերթի փոխանցմամբ՝ Թուրքիայի արտգործնախարար Ահմեդ Դավութօղլուն Իրանի արտգործնախար Ալի Աքբար Սալեհիի հետ քննարկել է իրանական հատուկ ծառայությունների կողմից Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) փաստացի ղեկավար Մուրադ Քարայըլանի ձերբակալության հարցը։
Հիշեցնենք, որ օգոստոսի 15-ին Իրանի խորհրդարանի ազգային անվտանգության և արտաքին քաղաքականության հանձնաժողովի նախագահ Ալաոլդին Բորուջերդին հայտարարել էր, որ իրենց հատուկ ծառայությունները Ղանդիլի լեռներում ձերբակալել են Մուրադ Քարայըլանին։ Սակայն հետագայում այդ տեղեկատվությունը հերքվել էր։
Հանդիպումից հետո կազմակերպված համատեղ մամլո ասուլիսի ժամանակ Դավութօղլուն ու Սալեհին հայտարարել են, որ երկու երկրները պայքարելու են PKK-ի և նրա իրանական թևի՝ «Քրդստանի ազատ կյանք» կուսակցության (PJAK) դեմ։ Նրանք ընդգծել են, որ PKK-ն ու PJAK-ը սպառնում են տարածաշրջանային կայունությանն ու թուրք, քուրդ ու պարսիկ ժողովուրդներին։ Դավութօղլուի խոսքերով՝ Թուրքիան ու Իրանը տարբերություն չեն դնում PKK-ի ու PJAK-ի դեմ պայքարում։
Քարայըլանի ձերբակալության հետ կապված՝ Սալեհին հերքել է դա՝ նշելով, որ Իրանը երբեք չի ձերբակալել նրան և եթե իրանական կողմը ձերբակալած լիներ նրան, ապա բնականաբար նրան ազատ չէր արձակի և կհանձներ թուրք եղբայրներին։
Հիշեցնենք, որ 10 օր առաջ թուրքական Yeni Şafak թերթը գրել էր, որ Իրանը Ղանդիլի լեռներում նախ ձերբակալել, ապա բաց է թողել Քարայըլանին։ Ընդ որում, ուշագրավն այն էր, որ Քարայըլանի և նրա մերձավորների գտնվելու վայրի կոորդինատները Թեհրանին հայտնել էր Թուրքիայի Ազգային հետախուզական կազմակերպությունը (MIT): Արդյունքում՝ Իրանի անվտանգության ուժերին հաջողվել է ձերբակալել նրանց։
Դա տեղի էր ունեցել Հյուսիսային Իրաքի թուրքական ավիառմբակոծությունների մեկնարկից (օգոստոսի 17) երկու օր առաջ։ Դրանով Իրանը թուրքական ռմբակոծություններից փրկել էր նրանց և տարել Ուրմիա քաղաք։ Ապա իրանական կողմը տեղի ունեցած բանակցությունների արդյունքում նրանց բաց էր թողել։
