«Հեղեղատարների հետ կապված նորոգման աշխատանքները ժամանակին պետք է ավարտել, որպեսզի անձրևների շրջանում խնդիրների առաջ չկանգնենք»,-նշել է Երևանի քաղաքապետ Կարեն Կարապետյանն աշխատանքային հերթական խորհրդակցության ժամանակ:
Անդրադառնալով ձմռան նախապատրաստական աշխատանքներին` քաղաքապետը վարչական շրջանների ղեկավարներին հանձնարարել է արագացնել աղի ու ավազի կուտակման, ինչպես նաև համապատասխան մեքենամեխանիզմների վերազինման հետ կապված աշխատանքները:
Կոմունալ տնտեսության վարչության պետը ներկայացրել է Երևանի վարչական շրջանների բազմաբնակարան շենքերում իրականացված ձմռան նախապատրաստական աշխատանքների ընթացքը: Զեկուցվել է, որ արդեն կատարվել է 13.903 գծմ ջրթափ խողովակների նորոգում, ջերմամեկուսացվել է 2200 գծմ խողովակ, ապակեպատվել 9136 քմ տարածք, 480 մուտքերում տեղադրվել են նոր դռներ:
Աղբահանության պայմանագրերի կնքնման և հավաքագրման ընթացիկ աշխատանքների վերաբերյալ զեկուցվել է, որ օգոստոսի համեմատությամբ հավաքագրման աճը սեպտեմբերին կազմել է 8.7 տոկոս:
Քաղաքապետը հանձնարարել է ուժեղացնել հսկողությունը մայրաքաղաքում կառուցապատում իրականացնող ընկերությունների կողմից սահմանված ժամկետում աշխատանքներն իրականացնելու, անվտանգության կանոնների և պայմանագրային մյուս պարտավորությունների կատարման վերահսկման նպատակով:
«Յուրաքանչյուր վարչական շրջան պետք է ունենա իր փոքր կենտրոնը՝ հրապարակով, ժամանցային և մշակութային կենտրոններով և սպասարկման այլ կետերով: Այդպիսով մենք թե կընդալայնենք Կենտրոն հասկացությունը, և թե կնպաստենք մայրաքաղաքում նոր գրավիչ վայրի ձևավորմանը» -նշել է քաղաքապետ Կարեն Կարապետյանը:
Ծրագիրը 2012թ. իրագործելու նպատակով քաղաքապետը վարչական շրջանների ղեկավարներին հանձնարարել է ներկայացնել ֆինանսական գնահատական ՝ միաժամանակ ակտիվացնելով աշխատանքը ներդրումային հոսքերի ներգրավման ուղղությամբ:
Ներդրումային խոշոր ծրագրերում քաղաքապետարանի ենթակայության առողջապահական հիմնարկների ներգրավվածության հետ կապված առողջապահության վարչության պետը զեկուցել է, որ 3 համաբուժարաններ արդեն համագործակցության առաջարկներ ունեն:
«Մենք պետք է համոզվենք, որ ներդրումային ծրագրերի շնորհիվ առողջապահության ոլորտը կբարձրացնի առողջապահական հիմնարկների որակական չափանիշները և մասնավորի ու պետականի համագործակցությունը ցանկալի զարգացում կունենա: Դրա համար շատ կարևոր է, որ նախ և առաջ բոլոր բուժհիմնարկներն ունենան իրենց զարգացման և ներդրումային ծրագրերն ու առաջարկները»,- նշել է Կարեն Կարապետյանը:
Ներկայացվել է նաև տրանսպորտային միջոցներով Երևան մուտք գործող զբոսաշրջիկների համար մայրաքաղաքի փողոցները և տեսարժան վայրերն ավելի հասանելի դարձնելու նպատակով համապատասխան վայրերում ցուցիչ վահանակներ տեղադրելու ընթացքի հետ կապված աշխատանքները:
Կամուրջների և փողոցների թեք լանջավոր հատվածների կանաչապատման և հենապատերի կառուցման աշխատանքների հետ կապված զեկուցվել է, որ համապատասխան աշխատանքներ են ընթանում մի շարք հատվածներում:
Մայրաքաղաք մուտք գործող ճանապարհների և դրանց հարակից տարածքների բարեկարգման, կանաչապատման և ձևավորման աշխատանքների ընթացքի հետ կապված բնապահպանության վարչության կողմից զեկուցվել է, որ Երևան – Արգավանդ ուղետարին հարակից տարածքի 3,2 հեկտարը բարեկարգված է, անցկացված է ոռոգման ցանց և այժմ կատարվում է սիզամարգի ցանք: Երևան-Սևան մայրուղում ևս ավարտվել են բարեկարգման և ոռոգման ցանցի անցկացման աշխատանքները, կատարվել է կանաչապատում`մշտադալար տնկիներով ։ Երևան-Աշտարակ մայրուղու հատվածում փոխվել են մայթերի եզրաքարերը, ընթացքի մեջ են հողային աշխատանքները, անցկացվում է լուսավորության համակարգ: Քաղաքապետը հանձնարարել է մինչև հոկտեմբերի վերջ ավարտել նշված ուղղությամբ իրականացվող աշխատանքները։
Մայրաքաղաքում շարունակվող ասֆալտապատման աշխատանքների հետ կապված` Կարեն Կարապետյանը հանձնարարել է կատարել գույքագրում, ճշգրտել աշխատանքներն իրականացնող կազմակերպությունների կողմից պայմանագրային պարտավորությունների ու աշխատանքների կատարման ժամկետները:
Սպորտի բաժնի պետը զեկուցել է, որ քաղաքապետի հանձնարարությամբ ներկայում մշակվում է առողջ ապրելակերպի քարոզչությանն ու մասսայականացմանն ուղղված հայեցակարգ։ Քաղաքապետը հանձնարարել է այդ աշխատանքներում ակտիվորեն ներգրավել վարչական շրջաններին և տեղերում հնարավորին շատ կազմակերպել մասսայական մարզական միջոցառումներ։
