««Ժառանգությունը» ոչ մի ուժի թույլ չի տա ընտրությունների ժամանակ իր «ուսին հենվելով» քաղաքական դաշտ գալ»,- այսօր լրագրողների հետ հանդիպման ժամանակ այս մասին հայտարարեց կուսակցության մամուլի քարտուղար Հովսեփ Խուրշուդյանը:
Նա տեղեկացրեց, որ կուսակցությունը Երևանում և հանրապետության մարզերում իր համակիրների հետ հանդիպումների շարք է սկսել` միաժամանակ նկատելով, որ դրանք նախընտրական հանդիպումներ չի համարում և չի կարծում, թե Հայաստանում, առհասարակ, նախընտրական շրջանը մեկնարկել է:
Անդրադառնալով Հայաստանի երկրորդ նախագահ Ռոբերտ Քոչարյանի հնարավոր վերադարձի թեմային` Խուրշուդյանը նկատեց, որ ժողովրդի հետ շփումները վկայում են, որ մարդիկ չեն ցանկանում նրա վերադարձը:
Լրագրողներից մեկի հարցին` ի՞նչ տվեց «Ժառանգության» առաջնորդ Րաֆֆի Հովհանիսյանի հացադուլը` Խուրշուդյանը նկատեց. «Դա շատ լավ նախադեպ էր, երբ նման դիրքի քաղաքական գործիչն ինքը գնաց ինքնազոհողության, այլ ոչ` մնացածների նման բավարարվեց ժողովրդին անձնազոհության կոչեր անելով»:
Հիշեցնենք, որ Րաֆֆի Հովհաննիսյանն ամիսներ առաջ Ազատության հրապարակում օրեր տևած հացադուլ էր անցկացրել` բողոքելով երկրում առկա քաղաքական և տնտեսական իրավիճակից: