ՍԴՀԿ ատենապետ Լյուդմիլա Սարգսյանն այսօր լրագրողների հետ հանդիպման ժամանակ նշեց, որ ՀԱԿ-ը վերահաստատում է իր նպատակը և հասկացել է, որ այսուհետև որևէ թեմա իշխանությունների հետ քննարկելն անիմաստ է: Նա նշեց, որ ՀԱԿ-ը բարի կամք էր արտահայտել` երկխոսել այս իշխանությունների հետ` երկրում օրինական իշխանություն ձևավորելու համար, սակայն իշխանությունը ցույց տվեց, որ պատրաստ չէ երկխոսության և պարզապես իմիտացիա է անում:
Սարգսյանը հիշեցրեց, որ անգամ շուրօրյա հանրահավաքների ժամանակ է Կոնգրեսը հայտարարել, որ պատրաստ է երկխոսության. «Սակայն ինչպես տեսաք, իշխանությունը չգնաց այդ քայլին և նույնիսկ ուրախ էր, որ երկխոսությունը դադարեցվել է: Անկեղծ ասած, ես ինքս էլ ուրախ եմ, որ երկխոսությունը դադարեցվեց, քանզի վսատհ էի, որ այն արդյունք չէր տալու, բայց Կոնգրեսը պարտավոր էր այդ քայլն անել»:
ՍԴՀԿ ատենապետը նկատեց, որ երկրի տնտեսական վատթար վիճակը, արտագաղթի աճող տեմպերը, ինչպես նաև բանակի սարսափելի վիճակը, երբ այն ընկալվում է որպես քրեակատարողական հիմնարկ, բերել է այն համոզման, որ գործող քրեաօլիգարխիկ համակարգը պետք է հեռանա իշխանությունից. «Եվ մենք մեր անկախությունը նորից պետք է վերանվաճենք: Ռոբերտ Քոչարյանի օրոք Հայաստանը դարձավ մեծ տերությունների ֆորպոստ, դժբախտաբար Սերժ Սարգսյանի օրոք այդ վիճակն էլ ավելի խորացավ»:
Սարգսյանը նկատեց, որ չափազանց ամոթալի է, որ Ռուսաստանի դեսպանի խորհրդականը Հայաստանի ԱԽՔ-ի հետ զրույցում դժգոհում է, որ ռուսական դպրոցների քանակը քիչ է Հայաստանում, և առաջարկում է քայլեր ձեռնարկել այդ ուղղությամբ. «Ով է Ռուսաստանի դեսպանի խորհրդականը, որ նման բան ասելու իրավունքն ունի, մարդկանց մոտ ստորացվածության զգացում կա, 700 տարի անկախության ձգտող ժողովուրդն այսօր կասկածում է անկախության իրականությանը»:
Սարգսյանը հավելեց, որ նման վիճակից դուրս գալու համար պետք է Սերժ Սարգսյանը հրաժարական տա, ինչին հասնելու համար Հայ ազգային կոնգրեսը համապատասխան մեխանիզմներ ունի: