Գործող ցիկլոնն առաջիկա օրերին կտեղափոխվի Կասպից ծով` իր տեղը զիջելով արևմուտքից մոտեցող անտիցիկլոնային դաշտին, ինչով պայմանավորված` մոտակա երեք օրերին հանրապետության տարածքում կհաստատվի անամպ և առանց տեղումների եղանակ: «Առաջին լրատվականի» հետ զրույցում այս մասին ասաց «Հայպետհիդրոմետ» հիդրոօդերևութաբանության կենտրոնի օդերևութաբանական կանխատեսումների բաժնի պետ Գագիկ Սուրենյանը:
«Ինչ վերաբերում է ջերմային ֆոնին, ապա այսօր գիշերը եղանակի պարզեցմամբ և հյուսիս-արևմուտքից ցուրտ օդային հոսանքների ներթափանցմամբ պայմանավորված` Հայաստանի ողջ տարածքում ջերմաստիճանը գիշերը կնվազի 4-6, իսկ ցերեկը` 2-4 աստիճանով:
Լեռնային շրջաններում գիշերը կգրանցվի 0-5, ցերեկը` 17-21, նախալեռնային գոտում` գիշերը` 3-8, ցերեկը` 18-23 աստիճան տաքություն: Հովտային շրջաններում գիշերը կլինի 9-11, ցերեկը` 20-23 աստիճան զրոյից բարձր»,- նշեց Սուրենյանը:
Ամփոփելով` նա նաև տեղեկացրեց, որ առաջիկա 3 օրերին հանրապետությունում ջերմաստիճանը կգտնվի նորմայի սահմաններում: «Երևանում ևս, սպասվում է առանց տեղումների եղանակ, գիշերը կգրանցվի 5-7, ցերեկը` 21-23 աստիճան տաքություն»,- ասաց «Հայպետհիդրոմետ» հիդրոօդերևութաբանության կենտրոնի օդերևութաբանական կանխատեսումների բաժնի պետը: