ՀՖՖ նախագահ Ռուբեն Հայրապետյանը Facebook-ի իր էջում անդրադառնալով նախօրեին Դուբլինում կայացած Իռլանդիա- Հայաստան հանդիպմանը՝ մրցավարին անվանել է տգետ:
Ռուբեն Հայրապետյանը խորին շնորհակալություն է հայտնել բոլոր ֆուտբալասերներին, ովքեր նույնիսկ անհաջողության դեպքում կանգնած մնացին հավաքականի կողքին. «Իսկական ֆուտբալասերը հենց ձեր նման է լինում: Ես հպարտանում եմ ձեզանով, որ դուք կաք և աջակցում եք ազգային հավաքականին:
Իրականում մենք ունենք իրոք ուժեղ,պայքարող, նվիրված իրենց գործին ֆուտբոլիստներ: Նրանք արժանի էին հաղթանակի: Բայց ֆուտբոլն ունի իր դաժան օրենքները: Եկեք չհուսախափվենք և աջակցենք մեր սիրելի թիմին և մեր հրաշալի տղաներին: Նրանք արժանի են ամենաբարձր մեծարմանը: Ինչ վերաբերում է մրցավարին, մենք արդեն բողոքարկել ենք մրցավարի արարքների համար, բայց ինձ քիչ է հետաքրքրում այդ տգետին պատժելը:
Ինձ ավելի շատ հետաքրքրում է Բերեզովսկու կարմիր քարտը չեղյալ անելը: Ինչ վերաբերում է ՈւԵՖԱ-ի կողմից պատվերին, սիրելի ֆուտբալասերներ, խնդրում եմ հավատացեք ինձ, ՈւԵՖԱ-ի կողմից նման պատվեր չէր կարող լինել: Միշել Պլատինին այն մարդը չէ, որ իրեն թույլ տա նման արարք կատարի: Ինչ վերաբերում է տղաներին մեծարմանը, մենք տարեվերջին անելու ենք մեծարման արարողությունը շատ բարձր մակարդակով: Նորից ու նորից շնորհակալություն եմ հայտնում բոլորին, աշխարհասփյուռ հայությանը, ցանկանում եմ համբերություն և բոլորս միասին երկրպագենք ազգային հավաքականին: Առաջ Հայաստան»:
