«Հեզբոլլահ» խմբավորման առաջնորդ Նաիմ Քասեմը Լիբանանի կառավարությանը կոչ է արել դադարեցնել Իսրայելին ուղղված «անվճար զիջումները»՝ հաջորդ շաբաթ Վաշինգտոնում կայանալիք երկկողմ բանակցություններից առաջ։ «Al-Manar» հեռուստաընկերությամբ հեռարձակված գրավոր ուղերձում Քասեմը շեշտել է, որ իրենք չեն ընդունի նախկին իրավիճակին վերադարձը և կոչ են անում պաշտոնյաներին լինել ավելի վճռական։
«Մենք չենք ընդունի նախկին իրավիճակին վերադարձը, կոչ ենք անում պաշտոնյաներին դադարեցնել անվճար զիջումներ առաջարկելը», – ասել է Քասեմը։
Վարչապետ Բենիամին Նեթանյահուն երեկ հայտարարել էր, որ Իսրայելը «հնարավորինս շուտ» կսկսի բանակցություններ Լիբանանի հետ՝ ուղղված «Հեզբոլլահին» զինաթափելուն և երկու երկրների միջև լիարժեք խաղաղության համաձայնագրի հասնելուն։
