Sky Sports-ի փոխանցմամբ՝ Իռլանդիայի հավաքականի և անգլիական «Ասթոն Վիլլա»-ի դարպասապահ Շեյ Գիվենը հարձակվող Ռոբբի Քինի բացակայության պայմաններում այսօր Դուբլինում կայացող «Իռլանդիա-Հայաստան» խաղի ժամանակ լինելու է իր թիմի ավագը։
Գիվենն այդ խաղի կապակցությամբ նշել է. «Նախորդ խաղերը նշանակություն չունեն։ Մեզ համար կարևորը գոլ բաց չթողնելն է, քանի որ ոչ ոքին մեզ հնարավորություն է ընձեռում մասնակցելու անցումային խաղերին։
Մենք այսօր հուսալի տեսք ունենք։ Այն, ինչ տեղի է ունեցել նախորդ 8 կամ 9 խաղերում, նշանակություն չունի, կարևորը միայն այս խաղն է։ Մենք գիտենք, որ կհայտնվենք փլեյ-օֆֆ փուլում, եթե մեր դարպասն անառիկ պահենք։ Հուսով եմ, որ դա մեզ կհաջողվի, սակայն մենք չպետք է հաշվի առնենք նախորդ խաղերը։
Սա նոր խաղ է, մենք պետք է կենտրոնանք դրա վրա և հանդիպման ընթացքում կայացնենք ճշգրիտ որոշումներ։ Հայաստանը ռեալ սպառնալիք է։ Չեմ կարծում, թե այդ թիմում կան գերաստղեր, սակայն նրանք բոլորն էլ բարձր մակարդակի խաղացողներ են։ Դա հաստատում են նրանց վերջին երեք հանդիպումները, որոնցում հայերը դարձել են 11 գոլի հեղինակ։
Այսօրվա հանդիպումը կլինի բարդագույն, և դա լուրջ փորձություն կհանդիսանա մեր ողջ թիմի համար՝ ներառյալ ինձ։ Սակայն հայերի համար էլ այս հանդիպումը հեշտ չի լինի։ Մենք նույնպես ունենք խաղացողներ, որոնք ունակ են գոլ խփելու»։
