Ինչպես գրում է իտալական La Stampa թերթը, Ռուսաստանի Դաշնության նախագահ Վլադիմիր Պուտինը և Իտալիայի վարչապետ Սիլվիո Բեռլուսկոնին շատ սերտ հարաբերությունների մեջ են: Որպես դրա ապացույց՝ թերթը նկարագրում է մի դրվագ նրանց հարաբերություններից, որը հրապարակվել է InoPressa կայքում:
Մի անգամ Ռուսաստանի վարչապետը հյուրընկալել է Բեռլուսկոնիին, և նրանք միասին որսի են գնացել։ Պուտինն այդ որսի ժամանակ եղջերու է սպանել: Հանելով մեծ դանակը` Պուտինը կտրել է կենդանու կրծքավանդակը, հանել սիրտն ու մեկնել այն իտալացի գործընկերոջը` որպես իրենց սերտ ընկերության նշան: Բեռլուսկոնին, ըստ թերթի, սփրթնել է և ուշագնաց եղել:
WikiLeaks փոխանցած տեղեկությունների համաձայն՝ Պուտինը հաճախ է լինում Բեռլուսկոնիի առանձնատանը: Ըստ թերթի` Պուտինի և Բեռլուսկոնիի հարաբերությունները համարվում են ռուս-իտալական հարաբերությունների առանցքային տարրերից մեկը:
Վաշինգտոնն իր հերթին դժգոհ է այսօրինակ սերտ հարաբերություններից, քանի որ դա ազդում է Իտալիայի ներքին և արտաքին քաղաքականության վրա: «Ռուսաստանը Իտալիայից ստանում է զգալի տնտեսական առավելություններ, հասանելիություն ենթակառուցվածքներին և տեխնոլոգիաներին, գազի և նավթի՝ վերջինիս շուկաներին, որի փոխարեն Ռուսաստանն Իտալիային աջակցում է գազի մատակարարման և միջինասիական շուկաներին հասանելիության հարցում»,- ավելացնում է թերթը:
