News Georgia-ի փոխանցմամբ՝ Վրաստանի վարչապետ Նիկա Գիլաուրին կառավարության նիստում հայտարարել է, որ Ֆրանսիայի նախագահ Նիկոլա Սարկոզիի վրացական այցի ժամանակ ուղղակի աջակցություն հայտնվեց ԵՄ-ին և ՆԱՏՕ-ին Վրաստանի ինտեգրմանը.
«Մինչ այս պահը Ֆրանսիայի կողմից ուղղակի աջակցություն չէր հայտնվել։ Առաջին անգամ հնչեց այդպիսի աջակցություն, ինչը շատ կարևոր է Վրաստանի համար աշխարհաքաղաքական ակտիվության ու ներդրումների գրավչության տեսանկյունից։
Վրաստանը ՆԱՏՕ-ում և ԵՄ-ում շատ ընկերներ ունի։ Շատ կարևոր է, որ նրանց թվին հավելվեց Ֆրանսիան»։
Գիլաուրին նաև կարևորել է Սարկոզիի այն հայտարարությունը, որում ընդգծվել է, որ Ռուսաստանը չի կատարում 2008 թվականի զինադադարի համաձայնագրով ստանձնած իր պարտավորությունները։
Հիշեցնենք, որ Վրաստանի նախագահ Միխեիլ Սաակաշվիլին նույնպես կարևորել էր ԵՄ-ին ու ՆԱՏՕ-ին Վրաստանի անդամակցության հարցում Ֆրանսիայի աջակցությունը՝ ուշադրություն հրավիրելով այն բանի վրա, որ Ֆրանսիան, Գերմանիայի հետ մեկտեղ, հանդիսանում է մայրցամաքային) Եվրոպայի երկու առաջատար երկրներից մեկը։