Այսօր տեղեկություն տարածվեց առ այն, որ Սարյան փողոցի վրա գտնվող ճարտարապետ Ռաֆայել Իսրայելյանի տունը քանդվում է`դրա տեղում հյուրանոց կառուցելու նպատակով։ Facebook սոցիալական կայքում Երևանի քաղաքապետ Կարեն Կարապետյանի էջում այսօր մի խումբ ճարտարապետներ ու Երևանի ճակատագրով մտահոգ մի խումբ քաղաքացիներ հանդես եկան հայտարարություններով ու կոչերով` պահանջելով նախ`դադարեցնել ճարտարապետի կառուցած տան քանդումը, ապա հարցը քննարկել թե՛ մասնագիտական, թե՛ հանրային՝ հատկապես մտավորականների շրջանում:
Տեղեկությունների համաձայն `այդտեղ կառուցվելու է Երևանի գլխավոր ճարտարապետ Նարեկ Սարգսյանի հեղինակած 7-հարկանի հյուրանոց:
Վերոնշյալ տարածքը, ըստ Երևանի Կենտրոնի գոտիավորման հատակագծի, հանդիսանում է ցածրահարկ բնակելի կառուցապատման գոտի և նշված նախագիծը հակասում է Երևանի քաղաքապետարանի պատվերով
կատարված գոտիավորման նախագծին:
Քաղաքի այս հատվածում՝ 30-ականներին ձևավորած արվեստագետների թաղամասում, ապրել են Մարտիրոս Սարյանը, Ղազարոս Սարյանը, Արա Սարգսյանը, Կոջոյանը, Վարազդատ Հարությունյանը և այլք:
