News Georgia-ի փոխանցմամբ` աշխարհահռչակ շախմատիստ, ռուս ընդդիմադիր քաղաքական գործիչ Գարի Կասպարովը հինգշաբթի օրը ժամանելու է Վրաստան: Այս մասին լրագրողներին հայտարարել է սպորտի ու երիտասարդության հարցերով խորհրդարանական կոմիտեի նախագահ Գեորգի Ասանիձեն:
Վերջինիս խոսքերով` Կասպարովը հանդիպելու է Վրաստանի խորհրդարանի խոսնակ Դավիթ Բաքրաձեի հետ և մասնակցելու է խորհրդարանական կոմիտեների համատեղ նստաշրջանին: Դրանում Կասպարովը ելույթ է ունենալու քաղաքական այժմեական խնդիրների շուրջ:
Բացի այդ, նիստում Կասպարովը ներկայացնելու է իր՝ «Շախմատը դպրոցներում. նոր շարժում ժամանակակից կրթության համար» ծրագրի նախագիծը:
Նշվում է, որ այս այցը հանդիսանալու է վերջին մեկ տարվա ընթացքում Կասպարովի երկրորդ վրացական այցը: Նախորդ այցի ժամանակ Կասպարովը 5 օր վրացի ուսանողների համար դասախոսություն է կարդացել «21-րդ դարի աշխարհաքաղաքական մարտահրավերները» թեմայի շուրջ:
