Ռուսական Regnum լրատվական գործակալությունը, վկայակոչելով սիրիական «Սանա» պետական լրատվական գործակալությունը, հայտնում է, որ Սիրիայի անվտանգության ուժերը Թուրքիայի սահմանին առգրավել են նախագահ Բաշար Ալ-Ասադի ռեժիմի դեմ հանդես եկող ապստամբների համար նախատեսված զենքի խմբաքանակ։
Նշվում է, որ ընդհանուր առմամբ առգրավվել է 150 գնդացիր ու «Կալաշնիկով» տիպի ինքնաձիգ, ինչպես նաև մի քանի նռնականետ։
Հիշեցնենք, որ այս տարվա հունիսի 12-ին սիրիական «Սանա» պետական գործակալությունը հայտնել էր, որ Թուրքիայի սահմանին մոտ ընկած Ջիսր Ալ-Շուղուրում ձերբակալվել են Թուրքիայից Սիրիա ներթափանցած գրոհայինների երկու խմբեր, որոնց մոտ հայտնաբերվել են թուրքական հեռախոսաքարտեր, կապի միջոցներ, գումար: Դրանից մեկ օր անց՝ հունիսի 13-ին Ասադի մոտ 2000 կողմնակիցներ հարձակում գործեցին Դամասկոսում Թուրքիայի դեսպանատան վրա:
Ի դեպ, ոչ վաղ անցյալում Լիբիա կատարած այցի ժամանակ Թուրքիայի վարչապետ Էրդողանը Սիրիայի կառավարությանը որակել էր որպես «հանցավոր ռեժիմ» և կանխագուշակել նրա «շուտափույթ վախճանը»։
