Lenta.ru-ն, վկայակոչելով The Jerusalem Post-ին, հայտնում է, որ Թուրքիան F-16 տիպի կործանիչներ է ուղարկել իսրայելական F-15 տիպի 2 կործանիչների դեմ, որոնք անցել են Կիպրոսի վրայով, ընդ որում՝ կղզու թե՛ հունական, թե՛ թուրքական հատվածով։
Նշվում է, որ իսրայելական ինքնաթիռներն օդ են բարձրացել Թել Ավիվի բազայից, որից հետո շարժվել են Կիպրոսի ուղղությամբ։ Նրանք չեն արձագանքել Հյուսիսային Կիպրոսում տեղակայված թուրքական հակաօդային պաշտպանության՝ օդային տարածքը չխախտելու նախազգուշացումներին։
Ապա իսրայելական ինքնաթիռներին ընդառաջ են ուղարկվել F-16 տիպի կործանիչներ, որից հետո նրանք շրջվել են և վերադարձել բազա։ Իսրայելական ինքնաթիռները չեն թռել մեծ բարձրության վրա, դրա համար էլ հեշտությամբ նկատելի են եղել գետնից։
Բացի այդ, իսրայելական ուղղաթիռը ոչ մեծ բարձրության վրա թռել է թուրքական Piri Reis երկրահետախուզական նավի վրայով, որը զբաղված է կիպրական շելֆում նավթի որոնման աշխատանքներով։
Հիշեցնենք, որ մոտ մեկ շաբաթ առաջ էլ թուրքական լրատվամիջոցները գրել էին, թե Կիպրոսի երկնքում ընթանում է սառը պատերազմ՝ նկատի ունենալով այն, որ թուրքական և իսրայելական F-16 տիպի կործանիչները միտումնավոր թռել են միմյանց խիստ մոտ, ինչը բախման վտանգ է առաջացրել։
Ի դեպ, Թուրքիան և Հունաստանը տարիներ շարունակ նմանատիպ կեղծ օդային մարտեր են մղել Էգեյան ծովի հունական կղզիների օդային տարածքում, որոնց պատկանելության հարցը վիճարկում է Թուրքիան։ Դա թուրքական պատմագրության մեջ մտել է «շնային մարտեր» (İt dalaşı) անվանումով։
2006 թվականի մայիսին՝ հերթական «շնային մարտի» ժամանակ, հունական և թուրքական F-16 տիպի կործանիչների օդաչուները չէին կարողացել վերահսկել իրենց ինքնաթիռները և մոտ 9 կիլոմետր բարձրության վրա բախվել էին միմյանց։
