ԱՄՆ կառավարությունը, Կոլումբիայի համալսարանի ակտիվիստ Մահմուդ Խալիլին արտաքսելու փորձի համար ապացույցներ ներկայացնելու՝ միգրացիոն դատավորի սահմանած ժամկետին ընդառաջ, ներկայացրել է կարճ հաշվետվություն: Այն ստորագրել է պետքարտուղար Մարկո Ռուբիոն՝ վկայակոչելով Թրամփի վարչակազմի լիազորությունը՝ արտաքսելու օտարերկրացիներին, որոնց ներկայությունը վնասում է ԱՄՆ արտաքին քաղաքական շահերին:
Ըստ Associated Press-ի ձեռք բերած երկէջանոց հաշվետվության՝ փաստաթղթում չի նշվում Խալիլի կողմից որևէ հանցավոր գործողություն: Խալիլը, ով ԱՄՆ-ում օրինական մշտական բնակիչ է և ասպիրանտ, անցյալ տարի եղել է համալսարանի ակտիվիստների խոսնակ՝ Իսրայելի կողմից պաղեստինցիների նկատմամբ վերաբերմունքի և Գազայի պատերազմի դեմ բողոքի խոշոր ցույցերի ժամանակ:
Փոխարենը, Ռուբիոն նշել է, որ Խալիլը կարող է արտաքսվել իր համոզմունքների պատճառով: Նա գրել է, որ թեև Խալիլի գործողություններն «այլապես օրինական են», նրա՝ երկրում մնալը կխաթարի «ԱՄՆ-ի՝ աշխարհում և Միացյալ Նահանգներում հակասեմիտիզմի դեմ պայքարի քաղաքականությունը, ինչպես նաև ԱՄՆ-ում հրեա ուսանողներին ոտնձգություններից և բռնություններից պաշտպանելու ջանքերը»:
