ՀՀ-ում կան լուրջ բացթողումներ` կապված շենքերի փորձաքննությունների իրականացման հաճախականության հետ: Այս մասին «Առաջին լրատվականի» հետ զրույցում նշեց Շինանյութերի սերտիֆիկացում և փորձարկումներ իրականացնող «Փ.Աբաջյան» ՍՊԸ-ի տնօրեն Փիրուզա Աբաջյանը:
«Եթե կառուցվում է բազմահարկ շենք, ապա կառուցապատողը կարող է կա՛մ շենքի համար ներկայացնել մի քանի փորձաքննություն, կա՛մ մանրակրկիտ փորձաքննություն` յուրաքանչյուր հարկի համար: Կան մարդիկ, ովքեր աշխատում են փորձագիտական կազմակերպությունների հետ, իսկ որոշներն էլ դրան մեծ ուշադրություն չեն դարձնում:
Մինչդեռ լցման օրը յուրաքանչյուր բետոն պետք է ենթարկվի փորձաքննության, սա է նորման: Խոսքը ոչ միայն բարձրահարկ շենքերի մասին է: Երկհարկանի շենքերը ևս պետք է ենթարկվեն փորձաքննության, փորձը ցույց տվեց, որ երկրաշարժի ժամանակ երկհարկանի շենքերի փլուզումից էլ են մարդիկ զոհվել»,- ասաց Փ.Աբաջյանը:
Հարցին, թե ՀՀ-ում «էլիտար շենքերը» որքանո՞վ են համապատասխանում ստանդարտներին, տիկին Աբաջյանը պատասխանեց. «Երկրաշարժից հետո բավականին խստացվել է կառուցվող շենքերի տեխնիկական հսկողությունը, խստացվել են ստանդարտները, պահանջվում են արձանագրություններ, սակայն կցանկանայի, որ այդ արձանագրությունները ձևական բնույթ չկրեն: Եթե փորձարկման ընթացքում լինում են բացասական արդյունքներ, ապա անմիջապես պետք է սկսվի շենքի քանդման գործընթացը: Այս ոլորտում կարող եմ ասել, որ օրենքի ուժն է պակասում»:
