«Արմենպրես» գործակալությանը տված հարցազրույցի ժամանակ Լեհաստանի արտգործնախարար Ռադոսլավ Սիկորսկին անդրադարձել է Ղարաբաղյան հակամարտության կարգավորմանը.
«ԵՄ-ը շահագրգռված է Հարավային Կովկասի բոլոր հակամարտությունների, այդ թվում՝ նաև Ղարաբաղյան հակամարտության խաղաղ կարգավորմամբ։ Չնայած ԵԱՀԿ Մինսկի խումբը շարունակում է մնալ ղարաբաղյան բանակցային գործընթացում միջազգային միջնորդության հիմնական ձևաչափը՝ ԵՄ-ը նույնպես կարող է իր ներդրումն ունենալ հակամարտության խաղաղ կարգավորման գործընթացում՝ նոր ազդակ հաղորդելով բանակցություններին։
Հարավային Կովկասում և Վրաստանի ճգնաժամային հարցերի շուրջ ԵՄ-ի հատուկ ներկայացուցիչ Ֆիլիպ Լեֆորտի մանդատն իրենում ներառում է նաև Լեռնային Ղարաբաղի հարցը։ Հարավային Կովկասի հակամարտությունների կարգավորման վրա կարող են դրականորեն ազդել նաև տարածաշրջանում բարեկեցության ու ժողովրդավարության ընդլայնմանը և ազատ առևտրի գոտու ձևավորմանն ուղղված ԵՄ-ի քաղաքականությունը»։
Հիշեցնենք, որ Ֆիլիպ Լեֆորտը Հարավային Կովկասում և Վրաստանի ճգնաժամի շուրջ ԵՄ-ի հատուկ ներկայացուցիչ է նշանակվել այս տարվա օգոստոսի 26-ին, նրա մանդատն ուժի մեջ է մտել այս տարվա սեպտեմբերի 1-ից՝ մինչև 2012 թվականի հունիսի 30-ը։
