Նախագահ Թրամփի իշխանության վերադարձով ԱՄՆ-ի անցումն «Ամերիկան՝ ամենից առաջ» կոնցեպցիային տագնապալի համահունչ է «Գերմանիան ամեն ինչից վեր է» հիտլերյան կարգախոսին: Այդ մասին «Ռուսաստանը և գլոբալ քաղաքականությունը» հոդվածում գրել է Ռուսաստանի արտաքին գործերի նախարար Սերգեյ Լավրովը: Նրա հրապարակումից սկզբունքային դրույթներ է փոխանցել Ռուսաստանի ՏԱՍՍ պետական գործակալությունը:
Նրա խոսքերով՝ ԱՄՆ-ում հանրապետական վարչակազմի իշխանության գալով Վաշինգտոնի կողմից Երկրորդ համաշխարհային պատերազմին հաջորդած միջազգային գործընթացների ընկալումը նոր դրսեւորումներ է ունենում: Այս առումով Ռուսաստանի արտաքին գործերի նախարարը հատուկ անդրադարձել է Սենատում ԱՄՆ պետքարտուղար Ռուբիոյի հայտարարությանը, որ աշխարհակարգը ոչ միայն հնացել է, այլև վերածվել ԱՄՆ շահերի դեմ գործիքի:
«Այսինքն՝ անբավարար է ոչ միայն Յալթա-Պոտսդամյան աշխարհակարգը՝ ՄԱԿ-ի կենտրոնական դերակատարությամբ, այլև արդեն «կանոնների վրա հիմնված կարգը», որ, թվում է, ամփոփում էր սառը պատերազմից հետո Վաշինգտոնի առաջնորդած Արևմուտքի ողջ էգոիզմը»,- գրել է Ռուսաստանի արտաքին քաղաքական գերատեսչության ղեկավարը:
Մոսկվայում, երևում է, Թրամփի հայտարարությունը, որ եթե ինքը նախագահ լիներ, Ուկրաինայում պատերազմ չէր սկսվի,- նախապես խորքային չի գնահատվել: ԱՄՆ նախագահի պաշտոնում Թրամփի առաջին որոշումները, հնչեցրած հայտարարությունները վկայում են, որ նա պարզորոշ ասել է, թե Ռուսաստանին թույլ չէր տա «հատուկ ռազմական գործողություն սկսել»:
Իսկ այդ քայլին Ռուսաստանի նախագահը գնացել է, որպեսզի Միացյալ Նահանգներին «Յալթա-2» սկզբունքով բանակցություններ պարտադրի: Ստացվում է, որ ԱՄՆ պետքարտուղարը Յալթա-Պոտսդամյան աշխարհակարգը գնահատում է ամերիկյան շահերի դեմ գործիք: Այսինքն, Դոնալդ Թրամփն իր պաշտոնավարման շրջանում ամեն ինչ անելու է, որպեսզի ՄԱԿ-ի գլխավոր դերակատարությամբ աշխարհակարգը փոխվի:
Ռուսաստանի արտաքին գործերի նախարարի կողմից այդ քաղաքականության և հիտլերյան կարգախոսի միջև «տագնապահարույց նմանության» արձանագրումը չափազանց վտանգավոր է, եթե նկատի ունենանք, որ ՌԴ նախագահը հայտնվել է մի իրավիճակում, երբ ուկրաինական կարգավորման իր հռչակած սկզբունքներից որևէ նահանջ կարող է ներկրեմլյան խարդավանքներ և խառնակչություններ սադրել:
Ռուսաստանի նախագահին առընթեր Հանրային խորհրդի անդամ Ռեմչուկովը, որ «Նեզավիսիմայա գազետա»-ի գլխավոր խմբագիրն է, ծայրահեղ զգուշավորությամբ, բայց բավական թափանցիկ ակնարկում է, որ Վլադիմիր Պուտինը կարող է հրաժարվել ուկրաինական չորս մարզերն ամբողջությամբ միավորելու նպատակից: «Սահմանադրական փոփոխությունը խնդիր չի լինի»,- կարծում է նա:
Լավրովի հոդվածի տոնայնությունը, մինչդեռ, հուշում է, որ Մոսկվան մտադիր է մի որոշակի ժամանակահատվածում շարունակել մրցակցությունը: Ի՞նչ հաշվարկով է դա արվում՝ դժվար է կողմնորոշվել: Թրամփին Հիտլերի հետ համեմատելով եւ Յալթա-Պոտսդամյան աշխարհակարգի էջը փակելով՝ Սերգեյ Լավրովը նոր «Մոլոտով-Ռիբենտրոպ» պա՞կտ է առաջարկում: Բայց չէ՞ որ Արևելյան Եվրոպայի գերմանախորհրդային բաժանումը ոչ թե հեռացրել, այլ ավելի առարկայական է դարձրել համաշխարհային պատերազմի սպառնալիքը: Մոսկվան միջուկային պատերազմի ձեռնո՞ց է նետում:
