Անգլիայի առաջնության 6-րդ տուրում առաջին միավորները կորցրեց «Մանչեսթեր Յունայթեդ»-ը: Ալեքս Ֆերգյուսոնի սաները հյուրընկալվելիս ոչ ոքի` 1:1 հաշվով ավարտեցին հանդիպումը «Ստոուք Սիթի»-ի հետ: 27-րդ րոպեին Նանիի խփած գոլին 52-րդ րոպեին պատասխանեց տանտերերի ամենահայտնի ֆուտբոլիստը` Փիթեր Քրաուչը:
«Յունայթեդ»-ի սայթաքումից անմիջապես օգտվեց «Մանչեսթեր Սիթի»-ն: «Քաղաքաբնակներ»-ը 2 անպատասխան գնդակ ուղարկեցին «Էվերտոն»-ի դարպասն ու վաստակած 16 միավորով հավասարվեցին համաքաղաքացիներին: Գոլերի հեղինակներ դարձան Բալոտելլին (68 ր.) և Միլները (89 ր.):
Հաղթանակներ տոնեցին նաև 3-րդ և 4-րդ տեղերում ընթացող «Չելսի»-ն ու «Նյուքասլ»-ը: «Ազնվականներ»-ը «Սթենֆորդ Բրիջ» մարզադաշտում 4:1 հաշվով ջախջախեցին Պրեմիեր լիգայի նորեկ «Սուոնսի»-ին, գոլերի հեղինակներ դարձան Տորեսը (29 ր.), Ռամիրեսը (36, 76 ր.), Դրոգբան (90+1 ր.), հյուրերի կազմում միակ գոլը խփեց Ուիլյամսը (86 ր.): «Նյուքասլ»-ն իր հերթին 3:1 հաշվով պարտության մատնեց «Բլեքբըրն»-ին: Սենեգալցի հարձակվող Դեմբա Բայի հեթ-տրիկին (27, 30, 54 ր.) հյուրերից պատասխանեց Հոյլեթը (37 ր.):
Մյուս խաղերից կարելի է առանձնացնել «Արսենալ»-ի և «Լիվերպուլ»-ի հաղթանակները: Արսեն Վենգերի սաները 3 անպատասխան գնդակ ուղարկեցին «Բոլթոն»-ի դարպասը, իսկ Քենի Դալգլիշի թիմը 2:1 հաշվով հաղթեց «Վուլվերհեմփթոն»-ին:
6-րդ տուրի մյուս հանդիպումներում գրանցվեցին հետևյալ արդյունքները.
«Վեսթ Բրոմվիչ»-«Ֆուլհեմ»` 0:0:
«Ուիգան»-«Տոտենհեմ»-` 1:2:
«Քուինս Պարկ»-«Ասթոն Վիլլա»` 1:1:
«Նորվիչ»-«Սանդերլենդ» հանդիպումը կկայանա վաղը:
6-րդ տուրից հետո մրցաշարային աղյուսակի առաջատար 5-յակը դասավորվել է հետևյալ հերթականությամբ.
1.«Մանչեսթեր Յունայթեդ» 16 մ.
2.«Մանչեսթեր Սիթի» 16 մ.
3.«Չելսի» 13 մ.
4.«Նյուքասլ» 12 մ.
5.«Լիվերպուլ» 10 մ.
