Իտալիայի առաջնության 4-րդ տուրում «Ինտեր»-ը պարտվեց «Նովարա»-ին, «Միլան»-ն ու «Յուվենտուս»-ը սեփական հարկի տակ ոչ ոքի խաղացին համապատասխանաբար՝ «Ուդինեզե»-ի և «Բոլոնիա»-ի հետ:
«Ինտեր»-ը չափազանց վատ հանդիպում անցկացրեց և 3:1 հաշվով պարտություն կրեց առաջնության նորեկ «Նովարա»-ից, ինչը ճակատագրական եղավ թիմի գլխավոր մարզիչ Ջան Պիերո Գասպերինիի համար. ակումբի ղեկավարությունը հեռացրեց նրան զբաղեցրած պաշտոնից: Մեկնարկային 3 խաղում «Ինտեր»-ն ընդամենը 1 միավոր է վաստակել և մրցաշարային աղյուսակում զբաղեցնում է 18-րդ հորիզոնականը:
«Միլան»-ը նույնպես անհաջող է սկսել առաջնությունը և 4-րդ տուրում մեծ դժվարությամբ խուսափեց պարտությունից: «Ուդինեզե»-ի հետ հանդիպման 29-րդ րոպեին Դի Նատալեի խփած գոլին միլանցիները միայն 64-րդ րոպեին կարողացան պատասխանել. աչքի ընկավ Ալ Շաարավին:
Ոչ ոքի խաղաց նաև «Յուվենտուս»-ը: Հաղթանակի դեպքում Կոնտեի սաները ոչ միայն կավելացնեին միավորների տարբերությունը հիմնական մրցակիցներ «Միլան»-ից ու «Ինտեր»-ից, այլև միանձնյա կգլխավորեին մրցաշարային աղյուսակը, սակայն Թուրինյան ակումբը «Բոլոնիա»-ի հետ խաղում բավարարվեց 1 միավորով: Վուչինիչը 29-րդ րոպեին բացեց հանդիպման հաշիվը, սակայն 45-րդ րոպեին ստացավ երկրորդ դեղին քարտն ու հեռացվեց խաղադաշտից, իսկ 52-րդ րոպեին Պորտանովան խփեց պատասխան գնդակը: «Յուվենտուս»-«Բոլոնիա»` 1:1:
Տուրի մյուս հանդիպումներում գրանցվեցին հետևյալ արդյունքները.
«Չեզենա»-«Լացիո»` 1:2:
«Կիևո»-«Նապոլի»` 1:0:
«Ֆիորենտինա»-«Պարմա»` 3:0:
«Ջենոա»-«Կատանիա»` 3:0:
«Լեչե»-«Ատալանտա»` 1:2:
«Պալերմո»-«Կալյարի»` 3:2:
«Ռոմա»-«Սիենա» հանդիպումը կկայանա այսօր:
4-րդ տուրից հետո «Ջենոա»-ն, «Յուվենտուս»-ն ու «Ուդինեզե»-ն, վաստակած 7-ական միավորով, գլխավորում են մրցաշարային աղյուսակը:
