Սերժ Սարգսյանին ուղղված Ֆրանսիայի նախագահ Նիկոլա Սարկոզիի շնորհավորական ուղերձում ասված է.
«Մեծարգո՛ Նախագահ,
Հայաստանի անկախության 20-րդ տարեդարձի առիթով ցանկանում եմ անձամբ իմ և Ֆրանսիայի անունից լավագույն շնորհավորանքներս հղել Ձեզ և բոլոր հայերին:
1991-ի սեպտեմբերի 21-ին Հայաստանը վերահաստատեց կապը պատմության հետ և վերստին ստանձնեց իր ճակատագիրը տնօրինումը: Հայաստանը կարող է հպարտ լինել այն ամենով, ինչ իրականացրել է վերջին քսան տարիների ընթացքում՝ շատ հաճախ դժվար պայմաններում:
Հայաստանը ժողովրդավարություն է կերտել, անցել շուկայական տնտեսության և իր տեղը գտել միջազգային թատերաբեմում: Նա դա իրագործել է նաև շնորհիվ իր ժողովրդի խիզախության և աշխատասիրության, որին արժանին եմ մատուցում:
Այս տարիների ընթացքում, պատմական հինավուրց և ամուր կապերով միավորված Ֆրանսիան և Հայաստանը զարգացրել և անընդմեջ խորացրել են բեղմնավոր համագործակցություն բոլոր ասպարեզներում:
Վստահ եղեք, որ Ֆրանսիան Հայաստանի, իր բարեկամի կողքին է՝ օգնելու նրան դիմակայելու մարտահրավերներին: Ես առիթ կունենամ Ձեզ նորից շնորհավորելու և բարձրաձայն արտահայտելու Ֆրանսիայի բարեկամությունը Փարիզ կատարելիք Ձեր պաշտոնական մոտակա այցի, այնուհետև Հայաստան իմ պետական այցի ժամանակ, որի պատիվը և հաճույքը կունենամ առաջիկայում»: